16 августга ўтар кечаси Италиянинг Адриатика денгизи соҳилларидаги Марке минтақасига кучли бўрон ёпирилди, унинг оқибатида сув тошқини юзага келди. Маҳаллий ва жаҳон ОАВлари ҳодисани «сув бомбаси» деб атаб, уни вайронкорлиги жиҳатидан зилзилага қиёсламоқда. «РБК» табиий офат оқибатлари ҳақида фоторепортаж тайёрлади.
Италия шарқидаги Анкона провинциясида кучли ёмғир ва шамол туфайли юз берган сув тошқини оқибатида ўн киши ҳалок бўлди, яна уч киши бедарак йўқолди, уларнинг орасида бир нафар ёш бола ҳам бор, деб ёзади «Интерфакс». Баъзи манбаларга кўра, бедарак йўқолганлар тўрт киши бўлиб, шулардан икки нафари — болалар. Қарийб 50 киши касалхонага ётқизилган.
Анкона провинцияси жойлашган Марке минтақасида Вазирлар кенгаши фавқулодда ҳолат эълон қилди ва 5 миллион евро ҳажмидаги биринчи молиялаштириш траншини тасдиқлади. Ушбу провинция энг кўп зарар кўргани айтилмоқда: ер ўпирилишлари кузатилган, йўллар бузилган, «тез ёрдам» машиналари эса қийинчилик билан ҳаракатланмоқда.
Фуқаролар ҳимояси департаменти раҳбари Фабрицио Курсио маълум қилишича, жабр кўрган минтақада бир соат ичида бир йиллик ёғингарчилик меъёрининг қарийб учдан бир қисми ёғган, баъзи туманларда эса бутун ёз бўйи ёғган ёмғирдан икки баравар кўп ёғингарчилик бўлган.
Шунингдек, таъкидланишича, вақтинчалик жойлашув пунктларига аллақачон 150 киши жойлаштирилган, уларнинг сони ортиб бормоқда.
Инфратузилмага ҳам сезиларли даражада зарар етган. Дарё тошиб кетиши оқибатида Сенигаллиянинг тарихий марказидаги Гарибальди кўпригининг тошдан ясалган нақшинкор панжаралари зарар кўрган.
Пезаро-э-Урбино провинциясининг Кантиано шаҳрида эса 50 га яқин уйлар сув остида қолиб, қарийб 40 та машинани сув оқизиб кетган, шаҳар ичимлик суви, газ ва электрсиз қолган. Перголада 20 та уй сувга ғарқ бўлган, кўплаб оилалар эвакуация қилинган.
Маркеда сув тошқинлари қурбонлари хотирасига икки кунлик мотам эълон қилинди.
Италиянинг The Local нашри хабарига кўра, шу йил ёзда экстремал об-ҳаво ҳодисалари ўн йил аввалгига нисбатан беш марта кўпроқ қайд этилган. «Экстремал табиат ҳодисалари сони ошиши натижасида қишлоқ хўжалигига 2022 йилда 6 миллиард евродан кўпроқ зарар етди, бу ЯММнинг 10 фоизи демакдир», — дея маълум қилди Италия фермерлар ассоциацияси.
Изоҳ (0)