«Қодирхон» сериалидаги роли билан томошабинларга яхши таниш бўлган актёр Даврон Асқаров «Дарё»нинг YouTube каналига берган интервьюсида моддий жиҳатдан кўплаб қийинчиликларга учрагани, тамаддихонада икки йил официантлик қилгани ҳақида сўзлаб берди.
— «Бухоро» номли кафеда икки йил официантлик қилганман. У ерни самарқандлик инсонлар бошқаришарди, улардан ҳалигача миннатдорман. Икки йил давомида кунига 15 минг сўмдан пул олиб, ўша ерда ишлаганман. Чунки оиламга оғирлигим тушишини истамасдим. У пайтлари коллежда ўқирдим, дарсдан кейин официантлик қиламан, деб роса иш излаганман. Рус тилини яхши билмаганим учун кўп тамаддихоналар ишга олишмаган. Ўшанда официантлик қилиш ҳам осон эмаслигини тушунгандим. Бошқа ишхоналарда дипломингиз бўлса ишга оламан дегандек, официантликнинг ҳам ўзига яраша тартиб-қоидалари бор экан. Худога шукр, шундай ишларни қилиш ҳам бошимизда бор экан. Меҳнат қилиб, оч қолганимиз йўқ. Эркакнинг бошида ҳар қандай қийинчиликлар бўлар экан. Ишонаманки, ҳар бир эркакнинг эртами-кеч, албатта, омади келади. Ўша пайтда омадни ушлаб қолиш ва уни қадрлай билиш керак. Назаримда, моддий томондан берилган омад икки хил бўлади. У сизга яхшиликка, ёки ёмонликка хизмат қилади. Уни қай томонга йўналтириш эса инсоннинг ўзига боғлиқ.Актёрликдан омад кулиб боққач, жуда кўп имконият эшиклари очилди. Мен учун қийин бўлган ишларнинг битиши осон бўлиб қолди, — дейди Даврон Асқаров.
Суҳбат давомида у сериалга таклиф этилмасидан аввал клипи билан кўплаб телеканалларга боргани ва маблағи камлиги боис унинг клипларини намойиш этишни исташмагани ҳақида сўзлаб берди.
— Қўшиқчиликни орзу қилиб юрган пайтларим Азиз ака деган яхши инсоннинг ёрдами билан «Сен» номли клипни суратга олганман. У пайтларда клип суратга олиш энг катта орзуларимдан бири эди. Азиз ака клипни телеканалларда айлантириш учун 8 миллион пулни берганди. Пулнинг суммаси аниқ эсимда, чунки уни елкага илинадиган рюгзагимга солиб, биринчи «Zo‘r TV» каналига боргандим. Аммо ўша пайтда каналда қўшиқни бир маҳалдан бир ой «айлантириш» 16-18 миллион сўм эканлигини айтишди. «Саккиз миллион пулим бор, шу пулга 10 кун бўлса ҳам клипимни қўйиб беринглар», дегандим. Аллоҳ омадимни бериб, 10 кунда ҳам одамлар таниб қолар деб умид қилгандим. Аммо каналдагилар рад этишган. Кейин «Севимли» ва «My5» каналига борганман. Улар ҳам пул озлиги учун клипимни намойиш этишмаган. Ҳомийлик қилган Азиз ака ҳам қўшимча пул топиб беролмагани учун охири клипни интернет тармоғига жойлаш билан кифояланганман, — дейди актёр Даврон Асқаров.
Даврон Асқаров ташқи кўринишининг бирдан ўзгариши ва тўлишиши унинг фойдасига хизмат қилгани ҳақида ҳам сўзлаб берди.
— Илк клипимдаги ташқи кўринишим билан бугунгиси ўртасида катта фарқ бор. Илгари анча озғин эдим. «Қодирхон» сериалига таклиф этилишдан аввал тез вазн тўплай бошладим. Бир неча ойда 80 кг бўлиб қолдим. Кейин кастингдан ўтиб, сериалга тасдиқлангач, ҳаётда ҳеч нарса бежиз бўлмаслигини, Аллоҳ биз истагандан ҳам хайрлисини ҳозирлаб қўйганига яна бир бор амин бўлдим. Агар вазн тўпламаганимда, «Қодирхон»даги рол менга насиб этмаслиги ёки Давроннинг ёрдамчилари олдида нимжон кўриниб қолиши мумкин эди. Қарангки, Яратган клипимни телеканалларда «айлантиролмай» юрган пайтимда менга бундан-да чиройли муваффақият ҳозирлаган экан, — дейди актёр Даврон Асқаров.
Мавзуга доир:
- «Қўқонда 750 минг сўм ойликка ўқитувчилик қилардим» — Даврон Асқаров танилгунига қадар кечирган қийинчиликлари ҳамда Мирза Азизовдан қаттиқ тарсаки егани ҳақида сўзлаб берди (видео)
- «Қодирхон» сериали актёри Даврон Асқаров санъаткорнинг қизига уйланаётгани, бўлажак рафиқаси ҳамда партнёрлари билан миш-мишлар ҳақида (видео)
- «‘Миллионъдаги арабча рақсим сабаб дадам гаплашмай қўйдилар». Актриса Нарминжан отасини хафа қилиб қўйгани ҳақида гапириб берди (видео)
Изоҳ (0)