«Конфуций таълимоти бизнинг миллий ғояларимизга жуда мос келади». Конфуций институти директори Шаҳриёр Сафаров билан суҳбат

Самарқанд шаҳрида Конфуций хиёбони очилади. Шу муносабат билан Конфуций институти директори Шаҳриёр Сафаров музейнинг қурилиш жараёни, ташкил этилиш сабаблари борасида «Дарё» мухбирига кичик интервью берди.

Шаҳриёр Сафаровнинг айтишича, Самарқандда Конфуций майдони қурилиши, қадимги хитой файласуфига атаб ҳайкал қўйилишининг асосий ташаббускори — Шавкат Мирзиёев. Давлат раҳбари Шанхай университети ҳовлисида Алишер Навоий ҳайкали қўйилганини эшитиб, Самарқандда шунга ўхшаш мажмуа қуриш топшириғини берган.

«Хитойлик ҳамда ўзбекистонлик меъморлар ҳамкорлигида мана шу майдон ташкил этилди. Майдон катта рамзий маънога эга. Аслида ‘Билимлар даргоҳи’ деб аталади. Кириш дарвозаси пештоғида ‘Энг буюк мутафаккир ва донишманд устозга’ деб ёзилган. Чунки хитой халқининг Конфуцийга бўлган эҳтироми жуда катта. Унинг таълимоти хитой халқининг асосий ҳаёт рамзига айланган.

Унинг қайд этишича, майдондаги мармар плиткаларда иероглифлар бор бўлиб, уларда ёзувлар мавжуд. Ёзувларда Конфуций ғоялари акс этган.

«Буларнинг ҳаммасида инсонпарварлик, муҳаббат, меҳр, ҳақиқат, адолат каби таълимотлар ёзилган. Конфуций ғоялари бизнинг миллий ғояларимизга жуда мос келади. Кўп жиҳатдан бир-бири билан уйғунлашиб кетган», — дейди у.