Олий Мажлис Қонунчилик палатасидаги «Миллий тикланиш» демократик партияси фракциянинг йиғилишида «Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида»ги қонунга ўзгартиш ва қўшимчалар киритиш ҳақида»ги қонун лойиҳаси муҳокама қилинди. Бу ҳақда қуйи палата ахборот хизмати хабар қилди.
Таъкидланишича, 2030 йилга қадар Ўзбекистон Республикасида гендер тенгликка эришиш стратегияси қабул қилиниб, уни 2021—2022 йилларда амалга ошириш бўйича комплекс чора-тадбирлар дастури тасдиқланган. Дастурнинг 1-бандида «гендер аудит» тушунчасини ва уни ўтказиш тартибини белгилашни назарда тутувчи қонун лойиҳасини ишлаб чиқиш белгиланган.
Шундан келиб чиқиб, юқоридаги қонун лойиҳаси ишлаб чиқилган. Ушбу ҳужжатда «Гендер аудит вазифалари» ва «гендер аудитни ўтказиш тартиби» махсус моддаларда белгиланмоқда. «Ўзбекистон Гендер тенгликни таъминлаш масалалари бўйича комиссияси» номи «Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси» номига ўзгартириляпти.
Муҳокамалар давомида депутатлар партия мақсад ва вазифаларидан келиб чиқиб қонун лойиҳасини янада такомиллаштириш бўйича бир қатор таклифлар берган. Уларнинг қонунчиликка киритилиши хотин-қизлар ва эркаклар учун тенг ҳуқуқ ҳамда имкониятлар кафолатларини таъминлаш механизмларини кучайтиришга хизмат қилиши айтилиб, қонун лойиҳаси маъқулланган.
Йиғилишда, шунингдек, кун тартибига киритилган бошқа қонун лойиҳалари ҳам муҳокама этилиб, тегишли қарорлар қабул қилинган.
Изоҳ (0)