Ўзбекистон Олий суди томонидан процессуал кодексларга ўзгартириш ва қўшимчалар киритиш устида ишланмоқда. Бу ҳақда Олий суд ахборот хизмати раҳбари Азиз Обидов «Дарё»га маълум қилди.
Азиз Обидовнинг айтишича, жамоатчиликда Бахтиёр Исломов олий суд раиси сифатида иш бошлаганидан буён нима қилиняпти, қанақа ишлар олиб бориляпти, деган савол туғилмоқда.
«Аслида бир ой катта ўзгаришлар қилиниши учун оз муддат. Лекин бир ой ичида ўзгаришларни бошлаш учун вақт етарли ва бу ўзгаришлар бошланди. Президентимиз томонидан Олий суд тизимини такомиллаштириш бўйича вазифалар белгилаб берилган. Вазифалардан келиб чиққан ҳолда инсон қадри ҳамма нарсадан устун деган ғоя асосида кўплаб норматив ҳужжатларга ўзгартиришлар, замон талабига, халқимизга мос келадиган қонуний адолат ва одил судловни янада такомиллаштириш ва ривожлантириш бўйича ишлар олиб бориляпти», – деди Олий суд вакили.
Унинг қўшимча қилишича, қатор процессуал кодексларга ўзгартириш ва қўшимчалар киритиш масаласи кўриб чиқилмоқда.
«Лойиҳалар тайёрланяпти. Манфаатдор вазирлик ва идоралар билан келишиш жараёни кетяпти, экспертлар ишлаяпти, хорижий тажриба ўрганиляпти. Албатта қонун ҳужжатларига ўзгартиш киритиш қисқа вақтда бўлмайди. Унинг ўзига яраша муддати, вақтлари бор. Бу, авваламбор, келишилади, манфаатдор идора ва вазирликлар билан ҳамфикр бўлиб, фикр ва мулоҳазалар жамланиб, кейин бу қонун лойиҳалари қонунчилик палатасига киритилади», – деди Азиз Обидов.
Аввалроқ Олий суднинг мурожаатлар билан ишлаш бўлимининг барча ходимларини ёппасига ишдан бўшатгани ҳақидаги хабарлар рад этилганди.
Изоҳ (0)