Лиз Трасс 6 сентябрь куни расман Буюк Британия бош вазирига айланди. Трасс вазифасига киришгач, ўзига содиқ консерваторларни ҳукуматга тайинлайди, чунки у зудлик билан «бугунги кундаги энг ёмон иқтисодий инқирозга қарши» курашиш режасини ишлаб чиқиши керак, деб ёзади Guardian.
Трасс ва унинг тарафдорлари ғалабадан хурсанд бўлган бўлса-да, бу эйфория тезда ўз ўрнини аччиқ реалликка бўшатиб беради, чунки мамлакат таназзул ёқасида, деб таъкидлайди нашр.
Guardian нашрининг ёзишича, Трасснинг энг яқин иттифоқчиси Квази Квартенг унинг молия канцлерига айланади. Шунингдек, янги бош вазир Свелла Браверманни ички ишлар вазири, Жеймс Клеверлини эса ташқи ишлар вазири этиб тайинлаши кутилмоқда. Натижада мамлакат тарихида биринчи марта тўртта асосий давлат лавозимида бирорта ҳам оқ танли эркак бўлмайди.
Газета тахминига кўра, Трасснинг рақиби ва собиқ молия вазири Риши Сунакка янги кабинетда лавозим берилмаслиги мумкин.
Лиз Трасс ўзининг иқтисодий дастури доирасида инфляция ва энергетика инқирозига қарши курашиш учун 130 миллиард фунт стерлинггача маблағ ажратишни режалаштираётгани хабар қилинганди. Сентябрь ойи бошида Трасс, агар бош вазир этиб сайланса, фаолиятининг биринчи ҳафтасида электр энергияси нархи ошишига қарши кураш режасини тақдим этишини айтган.
Европада энергетика инқирози жорий йил бошидан бери давом этмоқда, ёзда у рекорд даражадаги жазирама ва Россияга қарши санкциялар туфайли кучайган. Хусусан, Британияда электр энергияси учун тўловлар рекорд даражага чиқди.
Изоҳ (0)