Жўқорғи Кенгес раиси Аманбай Ўринбаев ичимлик сувига масъулларни охирги марта огоҳлантирди, дея хабар берди «Дарё» мухбири.
Маълум бўлишича, Қорақалпоғистон Республикаси Жўқорғи Кенгеси раиси Аманбай Ўринбаев 4 сентябрь куни Нукус шаҳри ва ҳудудлардаги аҳолининг тоза ичимлик суви билан таъминланганлик ҳолати билан танишган.
Қорақалпоғистоннинг янги раҳбари Нукус шаҳрида аҳолининг тоза ичимлик суви билан таъминланиш ҳолатини кескин тандиқ қилган. Аманбай Ўринбаев бу йўналишдаги ишларни яна ривожлантириш учун Қорақалпоғистон Республикаси прокурори Эркабой Тожиевга назоратни ташкил қилиш бўйича топшириқ берган.
Жўқорғи Кенгес раиси Аманбай Ўринбаев ҳудудларда сув иншоотларининг қурилишини кўздан кечириш жараёнида «Чимбойдаги бир маҳалланинг муаммосига икки йил бўлган. Аниқлик киритинг, Эркабой Аминович. 20 кун бўлди унинг бошлаганига. Бундан ортиқ огоҳлантириш бўлмайди. Тоза ичимлик суви одамларнинг кайфиятига таъсир қилади. Яхшиям Эркабой Аминович, Сиз кўтардингиз бу масалани. Бўлмаса ҳаммамизнинг оёғимиз ердан узилган эди. Назоратга олмасанг кўрдингми аҳволни?! Шунинг учун қурилиш соҳасини прокурорга топширганман» — дея таъкидлаган у.
Аввалроқ, Шавкат Мирзиёев раислигидаги Жўқорғи Кенгеснинг навбатдан ташқари 34-сессиясида Жўқорғи Кенгес раиси Мурат Камаловнинг бетоблиги сабабли ваколат муддатини олдиндан тўхтатиш ва эгаллаб турган лавозимидан озод этиш ҳақидаги мурожаати кўриб чиқилгани ҳамда лавозимидан озод этиш тўғрисида қарор қабул қилингани, ўрнига Аманбай Оринбаев Қорақалпоғистон Республикаси Жўқорғи Кенгеси раиси лавозимига тасдиқлани хабар берилганди.
Изоҳ (0)