Самарқанд вилояти Паст Дарғом туманида 1961 йилда туғилган аёлнинг номусига текканликда гумонланиб, тергов органларидан яшириниб юрган эркак қўлга олинди. Бу ҳақда вилоят ички ишлар бошқармаси хабар бермоқда.
Қайд этилишича, туманнинг «Ҳавзак» маҳалласида яшовчи, 1986 йилда туғилган К.Д. қидирув тадбирлари натижасида ушланган. Вилоят ва туман ИИБ тезкор ходимлари томонидан олиб борилган кенг қамровли қидирув тадбирлари натижасида ушбу шахс дастлаб Жиззах вилояти Зарбдор туманида, кейинчалик Арнасой туманида яшириниб юргани тўғрисида маълумот олинган.
Ушбу шахсни топиш юзасидан тезкор қидирув ҳаракатлари олиб борилди ва у Арнасой туманида жойлашган кўл ортидаги чекка бир ҳудудда яшириниб юрган вақтда ИИБ ходимлари томонидан қўлга олинган. У айни пайтда Паст Дарғом тумани ИИБга олиб келинган ва тергов ҳаракатлари олиб борилмоқда.
Маълумот учун, ушбу шахсга нисбатан 2022 йилнинг 12 март куни Жиноят кодексининг 118-моддаси (номусга тегиш) 1-қисми билан жиноят иши қўзғатилганди. Сиртдан айблов эълон қилиниб, қамоққа олиш тарзида эҳтиёт чораси қўлланилиб, қидирув эълон қилинганди.
Изоҳ (0)