Қашқадарёда тиббий ускуналарни қиммат нархларда сотиб олиб, бюджет маблағларини талон-торож қилган тиббиёт муассасаларининг мансабдор шахсларига нисбатан жиноий жазо чоралари қўлланилди, деб хабар бермоқда Коррупцияга қарши курашиш агентлиги матбуот хизмати.
Маълум қилинишича, агентлик томонидан 2021 йил июль ойида Қашқадарё вилоятида ўтказилган ўрганиш натижалари бўйича 10 та тиббиёт муассасаси томонидан 75 дона жами 7,8 миллиард сўмлик тиббий ускуналар Қарши шаҳридаги «Д.М.» МЧЖдан шартнома асосида жуда қиммат нархларда бюджет маблағлари ҳисобига сотиб олингани аниқланиб, мазкур ҳолат юзасидан тўпланган материаллар Бош прокуратура ҳузуридаги Иқтисодий жиноятларга қарши курашиш департаментига юборилган.
Департаментнинг вилоят бошқармаси томонидан тиббий ускуналарни асл нархидан 3 миллиард 150,6 миллион сўмга қиммат нархларда сотиб олингани бўйича 2021 йил 16 декабрь куни «Д.М.» МЧЖ раҳбари ва Қашқадарёдаги 10 та тиббиёт муассасаси мансабдор шахсларига нисбатан жиноят иши қўзғатилган.
(Қашқадарё вилояти 1-сон асаб руҳий касалликлар диспансери, вилоят Перинатал маркази, Республика суд-тиббий экспертиза илмий-амалий маркази Қашқадарё вилоят филиали, Нишон туман Тиббиёт бирлашмаси, Қашқадарё вилоят болалар кўп тармоқли тиббиёт маркази, Қашқадарё вилоят Фтизиатрия диспансери, Қашқадарё вилоят Кексалар ва ногиронлиги бўлган шахслар уруш ва меҳнат фахрийлари учун саноторияси, Қашқадарё вилояти 2-сон асаб руҳий касалликлар диспансери, Республика ихтисослаштирилган наркология илмий-амалий тиббиёт маркази Қашқадарё вилоят минтақавий филиали, Тери таносил касалликлари диспансери)
Хусусан, вилоят болалар кўп тармоқли тиббиёт маркази «Ултразвуковая диагностическая система Э-CУБЕ 8 с 4 датчиками» тиббий ускунасини 500 миллион сўмга (аслида 251,1 мллион сўмлик) ёки 200 фоизга (249,9 миллион сўм) устама қўйилган ҳолда сотиб олган.
Шунингдек, вилоят Тери таносил касалликлари диспансери томонидан ҳақиқий баҳоси 386,6 миллион сўмлик тиббий ускуналарни 944,1 миллион сўмга харид қилгани, яъни 557,5 миллион сўмга ёки 244,2 фоизга қиммат нархларда сотиб олиниб, бюджет маблағлари талон-торож қилингани суднинг ҳукми билан ўз тасдиғини топган.
Умуман, юқорида қайд этилган 10 та тиббиёт бирлашмасида 7,8 миллиард сўмлик ҳарид қилинган тиббий ускуналар бозор баҳосига нисбатан 3 миллиард 150,6 миллион сўмга қиммат нархларда харид қилиниб, бюджет маблағлари талон-торож қилингани тергов жараёнида аниқланиб, айбдор шахслардан 3 миллиард 150,6 миллион сўм бюджетга ундирилган.
Мазкур жиноят иши доирасида 10 та тиббиёт муассасасининг 11 нафар мансабдор шахслари ҳамда «Д.М.» МЧЖ раҳбари Жиноят ишлари бўйича Қарши тумани судининг 2022 йил 4 августдаги ҳукмига асосан Жиноят кодексининг тегишли моддалари билан айбдор деб топилиб, уларга нисбатан жиноий жазо чоралари белгиланган.
Шунингдек, улар 1 йил муддатга мансабдорлик лавозимларида ишлаш ҳуқуқидан ҳам маҳрум этилган.
Изоҳ (0)