Ўзбекистонлик афсонавий собиқ футболчи Азамат Абдураимов «Дарё» билан суҳбатда «Андижон»даги муваффақиятсизлик, футболчиларга ваъда қилинган 400 миллион сўм тўлаб берилмагани ҳақида гапириб ўтди.
«Андижон»да иш бошлаганимнинг дастлабки вақтларида менга ишонган, вилоят ҳокими бўлган бир раҳбар бор эди. У футболни севарди. 2012 йилда у ерда иш бошлаганимда жамоа қуйи лигага тушиб кетиш арафасида эди.Ўшанда у киши: «қўрқинчли жойи йўқ, агарда қуйи лигага тушиб кетсак, жамоани қайтадан тузамиз, иложи борича маҳаллий футболчиларни жалб қиламиз, ёшлардан иборат жамоа тузамиз» деганди. Шундай бўлди ҳам, биз қуйи лигага тушиб кетдик.
Жамоани туздик ва қийинчиликсиз биринчи лигадан олий лигага қайта чиқдик. Бироқ, бу давр мобайнида бизнинг ҳомийимиз бўлган ҳокимни бошқа ишга ўтказишди. Унинг ўрнига келган янги ҳоким футболга унчалик ҳам қизиқмасди. Бизда бир ёқимсиз ҳолат содир бўлди. Бизга олий лигага чиқсак, йигитларга 400 миллион бонус ваъда қилинганди. Ва улар раҳбариятга, мураббий сифатида менга ишониб, кўтарма пуллардан воз кечганди.
Улар вазифани бажарса, 400 миллион бонус сифатида олиши лозим эди. Жамоадаги ролига қараб Кимдир 10, кимдир 20, кимгадир эса 30 миллион олиши керак эди. Биз шартнома имзолагандик. Аммо биз вазифани бажарганимиздан сўнг бонусларни олмадик. Менга мураббий сифатида шартномага кўрсатилганидек машина беришди. Йигитларга эса ваъда қилинган 400 миллион берилмади. Ҳокимият ушбу пулларни бермади. Шу сабаб мавсум асабий бошланди. Йигитлар хафа бўлганди.
Азамат Абдураимов, собиқ футболчи, мураббий
Изоҳ (0)