Ўзбекистон Бош консулхонаси ходимлари миграция соҳасида илмий анжуман ўтказиш мақсадида Россия Фанлар академиясининг Урал бўлими иқтисодиёт институти директори Й.Лаврикова билан музокара ўтказди. Бу ҳақда Дунё ахборот агентлиги хабар қилди.
Қайд этилишича, учрашувда Ўзбекистон ва Россия ўртасидаги икки томонлама муносабатларнинг бугунги ҳолати ва истиқболлари ҳамда меҳнат миграцияси соҳасида амалга оширилган ишлар тўғрисидаги маълумот алмашилган.
Институт раҳбариятига Россияда меҳнат фаолиятини амалга ошираётган Ўзбекистон фуқароларининг иқтисодий, ижтимоий ва кундалик муаммолари ҳамда уларни ечиш йўлларига бағишланган илмий тадбир ўтказиш таклифи билдирилган. Мавжуд муаммоларни ўрганиш мақсадида режалаштирилган тадбирга мигрантлар, диаспора вакиллари, Россия ҳуқуқ-тартибот идоралари вакиллари, инсон ҳуқуқлари бўйича мутахассисларни жалб этиш кўзда тутилмоқда.
Й.Лаврикова ушбу таклифни қўллаб-қувватлашини таъкидлаган. Унинг айтишича, институт ходимлари томонидан амалга оширилаётган илмий тадқиқот ишлари доирасида МДҲ давлатларидан келган меҳнат муҳожирлари ўртасида қатор сўровлар ўтказилмоқда.
Мулоқот натижасида меҳнат миграция масалаларига бағишланган биринчи илмий анжуманни жорий йил сентябрь ойида ўтказишга келишиб олинган.
Изоҳ (0)