Ички ишлар вазири ўринбосари — Жамоат хавфсизлиги департаменти бошлиғи полковник Бекмурод Абдуллаев томонидан ўтказилган йиғилишда республикадаги барча йўл-патруль хизмати ходимларининг хизмат фаолияти даврида шахсий телефонидан фойдаланишини тақиқлаш бўйича кўрсатма берилгани ҳақида хабар эълон қилинганди. Ички ишлар вазирлиги ахборот хизмати раҳбари Шоҳрух Ғиёсов ҳолат юзасидан муносабат билдирди.
Маълум қилинишича, вазирлик раҳбарияти томонидан хизматга жалб этилган ЙПХ ходимларининг шахсий телефонларини йиғиб олиш бўйича кўрсатма берилмаган, фақат бегона одамлар ёки ҳайдовчиларнинг телефонига жавоб бериш каби ҳолатларга барҳам бериш қатъий назоратга олингани уқтирилган.
Ходимларнинг йўриқномада телефонларини йиғиб олиш масаласига келсак, бу жойлардаги айрим раҳбарларнинг шахсий ташаббуси бўлиши мумкин. Бундай ҳолатлар ўрганилади. ЙҲХХ матбуот котиби Азиз Муродовнинг ҳаракатини ҳам ўрганамиз. Журналистларга ҳозиржавоб бўлиши — унинг тўғридан-тўғри вазифаси, жавоб бермаганининг объектив сабаби бўлмаса, интизомий жазоланади, — дейди Ғиёсов.Маълумот учун, «Kun.uz» хабарида ЙПХ ходимлари ҳар куни эрталабки йўриқнома чоғида шахсий қўл телефонларини топшириб, хизматга телефонсиз чиқишлари ҳамда хизмат вақтида телефондан фойдаланмасликлари талаб этилаётгани билдирилганди.
Изоҳ (0)