Ўзбекистон ва Саудия Арабистони ўзаро туристлар оқимини 100 минг кишига етказмоқчи

Ўзбекистон Вазирлар Маҳкамасининг 2022 йил 13 июндаги топшириғига биноан Туризм ва маданий мерос вазирлиги ва Саудия Арабистони Қироллиги Туризм вазирлиги ўртасида туризм соҳасида ҳамкорлик тўғрисида ўзаро англашинув меморандуми имзоланди. Бу ҳақда вазирлик ахборот хизмати хабар берди.

Туризм соҳасида ўзаро фойдали ҳамкорлик ва дўстона алоқаларни қўллаб-қувватлашга, тенглик, ўзаро ҳурмат тамойилларига асосланган мазкур меморандумда қуйидагиларга келишиб олинди:

• ўзаро туристлар оқимини 100 минг кишига етказиш;
• туристларни жалб қилиш учун ўзаро маданий, сивилизацион ва тарихий меъросдан фойдаланишга тарғиб қилиш;
• мавжуд туристик йўналишларни янада ривожлантириш ва янги туристик йўналишларни очиш бўйича ўзаро келишилган чора-тадбирларни амалга ошириш, гуруҳ ва индивидуал туризмнинг ҳар хил турларини кенгайтириш;
• табиий ресурслар ва маданий бойликларни туристик диққатга сазовор жойлар сифатида сақлаш;
• меҳмонхона, туристик курортлар ва туристларни жойлаштириш объектларини уларнинг самарадорлигини текшириш механизмларини фаоллаштириш билан бошқариш;
• туристик тадбирлар ва сафарлар ташкиллаштириш;
• туризмни ривожлантириш учун инвестициялар киритиш;
• кичик ва ўрта туристик ташкилотларни, туристик сайтларни ривожлантириш.

Шунингдек, ҳужжатга кўра томонлар ОАВда чоп этилган мақолалар, фильмлар ва туристик экспонатларни ўзаро алмашади. Экспертлар ва туризмга ихтисослашган ОАV вакиллари учун ўзаро саёҳатлар ташкиллаштирилади. Меморандумда қўшма туристик фаолиятни ташкил этиш, ҳар икки давлатда ташкил этиладиган кўргазма, конференция ва симпозиумларда қатнашиш ҳам кўзда тутилган.

Қолаверса, қуйидаги жабҳаларда ҳам изчил ҳамкорлик йўлга қўйилди:

• туризмга ихтисослашган таълим муассасаларини ташкил этиш;
• туризм соҳасида ўзаро мутахассислар алмашиш;
• туризмга оид халқаро форумларда ўзаро ҳамкорлик қилиш ва бир-бирини қўллаб-қувватлаш.

Мазкур меморандум Ўзбекистон ва Саудия Арабистони Қироллиги ўртасида туризм соҳасидаги муносабатларнинг янада ривожланишига хизмат қилади. Туризм ва маданий мерос вазирлиги томонидан бундан аввал Туркманистон, Озарбайжон, Исроил, Тожикистон ва бошқа давлатлар билан ҳам туризм соҳасида турли келишувлар имзоланган.