Ўзбекистоннинг Бирлашган Араб Амирликларидаги элчихонаси томонидан ушбу мамлакат пойтахтида «Etihad Credit Insurance» ва «G42» компаниялари ҳамда «Abu Dhabi Export Office» агентлиги билан икки томонлама ҳамкорликни ривожлантириш бўйича тақдимотлар ташкил этилди, деб хабар бермоқда «Дунё» ахборот агентлиги.
Маълум қилинишича, тақдимотларда Ўзбекистон билан ўзаро ҳамкорликнинг истиқболлари ҳақида қатор таклифлар билдирилди. Шунингдек, БАА экспортида реекспортнинг ўрни юқори экани инобатга олинган ҳолда Ўзбекистон маҳсулотларини БАА орқали Форс кўрфази ва Африка мамлакатларига реекспорт қилиш имкониятлари ҳам атрофлича таҳлил қилинди.
Тадбир чоғида «Etihad Credit Insurance» компаниясининг суғурта хизматлари йўналишида Ўзбекистон суғурта компаниялари билан ҳамкорлик қилишдан манфаатдорлик билдирилди. Тақдимот доирасида бўлиб ўтган музокаралар давомида Ўзбекистонда хусусийлаштирилиши режалаштирилаётган банклар имкониятлари ҳамда 29 сентябрь куни Дубайда бўлиб ўтадиган маҳаллий банкларнинг «роудшоу» тадбири ҳақида фикр алмашилар экан, Амирликлар компанияси унда қатнашишини маълум қилган ҳолда давлат банкларининг хусусийлаштириш жараёнида иштирок этиш юзасидан ҳам қизиқиш билдирди.
«G42» компанияси Ўзбекистонда «Abu Dhabi Ports» компанияси билан ҳамкорликда Самарқанд шаҳри аэропортида маълумотлар базаси марказини қуриш лойиҳасида иштирок этаётганини ҳамда Тошкент шаҳри бўйича «ақлли шаҳар» лойиҳасини амалга ошириш бўйича дастлабки музокараларга киришганини маълум қилди.
«Abu Dhabi Export Office» агентлиги Ўзбекистон давлат идоралари ҳамда тижорат банкларига БАА компанияларидан товар (иш-хизматлар) импорт қилиниши учун мамлакатга кредит линияларини ажратишга тайёр экани, бу соҳада маҳаллий тижорат банклари ва давлат идоралари билан ҳамкорлик ўрнатишдан манфаатдорлик билдирди.
Музокаралар сўнгида Ўзбекистон Инвестициялар ва ташқи савдо вазирлиги ҳузуридаги Экспортни қўллаб-қувватлаш агентлиги ҳамда тижорат банклари ўртасида ўзаро ҳамкорликни давом эттириш юзасидан келишувга эришилди.
Изоҳ (0)