Наманганда фермерлар кенгашлари шикоятларига асосан ҳокимликларнинг 34 та қарори бекор қилинди

Наманганда жорий йили вилоят фермер, деҳқон хўжаликлари ва томорқа ер эгалари кенгаши томонидан фермер хўжаликлари манфаатларини кўзлаб жами 143,4 миллиард сўмлик 512 та тўлов талабномалари киритилди. Бу ҳақда «Дарё» мухбири Азизбек Абдувалиев хабар бермоқда.

Қайд этилишича, уларнинг аксарияти қаноатлантирилиб, фермер ва деҳқон хўжаликларига 142,6 млрд сўм тўлаб берилишига эришилган.

«Шаҳар-туман ҳокимларининг қарорларини ҳақиқий эмас деб топиш ва мажбурият юклаш ҳақида 45 та шикоят аризалари тайёрланди ва 34 та ҳолатда ҳокимликларнинг қарорлари ҳақиқий эмас деб топилди. Фуқаролик судларига ўзбошимчалик билан эгаллаб олинган ер майдонларидан мажбурий чиқариш бўйича 39 та даъво аризаси киритилиб, шундан 13 таси судлар томонидан қаноатлантирилди ва ер майдонлари ҳақиқий эгаларига олиб берилди», — дейди вилоят кенгаши раиси Носир Қаюмов.

Қаюмовнинг таъкидлашича, кенгаш томонидан жорий йил 6 ойи давомида судларга 3,3 миллиард сўмлик 133 та даъво аризалари киритилган. Улар судлар томонидан кўриб чиқиб, 2,4 миллиард сўмлик 108 та ариза бўйича фермерлар фойдасига ҳал қилув қарорлари чиқарилишига эришилган.

Мавзуга доир: Бош вазир ўринбосари топшириғи билан наманганлик фермерлар бошқа кластер билан ишлашга мажбурланаётгани айтилди. Ҳоким эса «фермер хоҳлаган кластери билан ишлайди» демоқда