Таниқли америкалик фотожурналист Элдер Ордонез Made in Uzbekistan ёзуви туширилган кўйлакда Нью-Йорк кўчаларида сайр қилаётган Голливуд актрисаси Гвинет Пелтроуни суратга олиб, ижтимоий тармоқлардаги саҳифаларига жойлаштирди. Суратда Гвинетнинг адрас нусхали ҳарир либосда ҳаракатланаётгани акс этган.
«Кеча бир тадбирни ёритаётганимда дугонаси билан тушлик қилиш учун кетаётган актриса Гвинет Пелтроуни учратиб қолдим. Биз актриса билан испан тилида суҳбатлашдик. Унга ўша ерда тадбирни суратга олаётганим ҳақида гапириб бердим. Айтганча, у испан тилида яхши гаплашар экан», — дейди асли келиб чиқиши испаниялик бўлган фотограф Элдер Ордонез.
Маълумот учун, актриса 1972 йилнинг 27 сентябрида АҚШнинг Калифорния штатида туғилган. Гвинет Пелтроу ўзини кўплаб соҳаларда синаб кўрган. Унинг кўплаб мухлислари бизнесда муваффаққият қозонган аёл, хонанда, ёзувчи сифатида эътироф этади. Актрисанинг кинодаги илк дебюти «Қичқириқ» кинокартинасидаги роли, кейинроқ эса Стивен Спилбергнинг «Капитан Ҳук» фильмидаги кичик эпизоди бўлган. Актриса «Ошиқ Шекспир» фильмидаги роли учун «Оскар» мукофотининг «Энг яхши аёл роли» йўналишида ғолибликни қўлга киритган. У дунёга машҳур «Темир одам», «Ўргимчак одам: Уйга қайтиш», «Етти», «Эмма», «Қасоскорлар» каби фильмларида рол ижро этган.
Мавзуга доир:
Изоҳ (0)