Самарқанддаги олий таълим муассасаларида ўқиш сентябрь ойининг охирида бошланади. Бу ҳақда Ургут тумани ҳокимлиги хабар қилди.
Қайд этилишича, 15—16 сентябрь кунлари Самарқанд Шанхай ҳамкорлик ташкилотининг навбатдаги саммитида мезбонлик қилади.
Шу муносабат билан Самарқанддаги олий таълим муассасалари бошқа вилоят ОТМларидан истисно тарзида ўқишни сентябрь ойининг охирларидан бошлайди. Тахминий сана — 22 ёки 26 сентябрь.
Жорий йил Самарқанддаги олийгоҳларга ўқишга ўтадиган абитуриентлар ҳам сентябрь ойининг охирида ўқишини бошлайди.
Маълумот учун, Шанхай ҳамкорлик ташкилотининг Самарқанд саммити Эрон 2021 йил сентябрида ташкилотга тўлақонли иштирокчи сифатида қўшилганидан бери биринчиси бўлади. ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Тожикистон, Покистон, Ҳиндистон ва Эрон. Афғонистон, Мўғулистон ва Беларусь ташкилотда кузатувчи, Туркия эса мулоқот бўйича ҳамкор сифатида иштирок этади.
Саммитда ташкилотга аъзо кўплаб давлатлар билан умумий чегарага эга Афғонистондаги вазият ҳар томонлама муҳокама қилинади ва муҳим қарорлар қабул қилиниши кутилмоқда.
Изоҳ (0)