Қорақалпоғистондаги ҳолатлар ва воқеалар юзасидан қўзғатилган жиноят ишлари бўйича айбланаётган шахсларнинг ҳуқуқ ва қонуний манфаатларини ҳимоя қилаётган адвокатлар билан 16 август куни учрашув ташкил этилди. Бу ҳақда Олий Мажлиснинг Инсон ҳуқуқлари бўйича вакили (омбудсман) ахборот хизмати хабар берди.
Таъкидланишича, комиссия аъзолари намойишлар пайтида қўлга олинган шахсларга ҳимояланиш ҳуқуқининг таъминланганлик ҳолатини ўрганиш мақсадида Қорақалпоғистон Адлия вазирлиги ҳамда Адвокатлар палатасининг ҳудудий бошқармаси вакиллари билан учрашган эди.
Ўзаро суҳбат давомида адвокатларга комиссия, унинг ташкил этилиш асослари, фаолияти ва шу кунга қадар амалга оширилган ишлар бўйича қисқача тушунтиришлар берилди.
Шунингдек, Қорақалпоғистондаги воқеа ва ҳолатлар бўйича олиб борилаётган тергов ҳаракатлари ҳақида адвокатларнинг фикрлари ўрганилди. Хусусан, тергов ҳибсхонасида ҳимояси остидаги шахслар билан учрашиш бўйича тўсқинлик қилиш, ушлаб турилган шахсларга яқин қариндошлари томонидан йўқловлар киритиш ҳолатлари, тергов ҳаракатлари давомида қийноққа йўл қўйиш ҳолатлари бўйича ҳимоя остидагилар хусусида маълумот олинди.
Бундан ташқари, тергов хоналарининг видеокузатув камералари билан таъминлангани ва адвокатларнинг видеоёзувларни сўраб олиш ҳуқуқидан фойдалангани бўйича маълумот олинди. Шу куннинг ўзида комиссия штабига келган 20 нафарга яқин фуқаронинг мурожаатлари қабул қилинди.
Изоҳ (0)