Ўзбекистонда 20 дан ортиқ компанияларнинг IPO ва SPO ўтказиш муддати маълум қилинди. Рўйхат

Ўзбекистонда Вазирлар Маҳкамаси томонидан давлат иштирокидаги йирик корхоналар акцияларини фонд биржасида бирламчи (IPO) ва иккиламчи (SPO) оммавий жойлаштириш тўғрисида қарор қабул қилинди. 

Қарорга кўра, давлат тасарруфидаги йирик корхоналарни аудитдан ўтказиш, хусусийлаштириш жараёнларига халқаро экспертларни жалб қилиш, компаниялар акцияларини хорижий ва маҳаллий фонд биржаларида оммавий жойлаштириш бўйича «йўл харитаси» қатъий белгиланди. 

IPO ва SPO ўтказиш орқали акциялар кенг оммага тақдим этилади.

IPO ва SPO’си бўлиб ўтадиган корхоналар рўйхати ва муддати:

• «Ўзметкомбинат» (IPO) — 2022 йил тўртинчи чорак ва 2023 йил биринчи чоракда;
• «Қурилишмашлизинг» (IPO) — 2023 йил апрель;
• Uzbekistan Airways (IPO) — 2023 йил июль;
• «Ўзбекинвест» (IPO) — 2023 йил иккинчи ва учинчи чоракда;
• «Ўзтрансгаз» (IPO) — 2023 йил иккинчи чоракда;
• «Халқ банки» (IPO) — 2023 йил иккинчи чоракда;
• «Ўзагросуғурта» (IPO) — 2023 йил март;
• «Қишлоқ қурилиш банк» (IPO) — 2022 йил август—октябрь;
• «Агробанк» (IPO) — 2022 йил сентябр—2023 йил январь;
• «Ўзмиллийбанк» (IPO) — 2023 йил июль;
• «Ўзбекнефтгаз» (IPO) — 2023 йил февраль—март;
• «Микрокредитбанк» (IPO) — 2023 йил июль;
• UzAuto Motors (IPO) — 2022 йил тўртинчи ва 20213 йил биринчи чоракда;
• «Ўзавтосаноат» (IPO) — 2023 йил март;
• «Алоқабанк» (IPO) — 2023 йил апрель;
• «Ўзтемир йўлконтейнер» (IPO/SPO) — 2023 йил июнь;
• «Ўзбекистон почтаси (SPO) — 2023 йил март;
• «Ўзбекгеофизика» (SPO) — 2023 йил июнь;
• «Универсал Суғурта» (SPO) — 2023 йил июнь;
• «Алском» (SPO) — 2023 йил июнь;
• «Дори-дармон» (SPO) — Вазирлар маҳкамаси розилигини олгандан сўнг. 

IPO нима ва у оддий одамларга нима беради?

IPO (Initial Public Offering) — бирламчи оммавий таклиф, акцияларни фонд бозори орқали сотиш жараёни. Бу корхона учун нафақат пул жалб қилиш, балки янги босқичга кўтарилиб, оммавий ва шаффоф бўлиш йўли дир. IPO’дан кейин деярли барча нарса ўзгаради — ҳисобот шаклларидан тортиб ривожланиш режаларигача.

IPO ўтказиш — хусусийлаштириш усулларидан бири. Сўнгги йилларда ҳукумат компанияларни кимошди савдоси ва аризалар қабул қилиш йўли билан сотиш орқали иқтисодиётдаги иштирокини камайтиришга ҳаракат қилмоқда.

Оддий одамлар учун бу йирик компаниянинг маълум бир қисмининг эгаси бўлиш ва фойданинг бир қисмини олиш имкониятидир.

Аввалроқ Ўзбекистондаги ягона фонд биржасига хорижлик раҳбар тайинланган эди.