«Олмалиқ кон-металлургия комбинати» АЖ раҳбарияти 16 август куни Миллий матбуот марказида бўлиб ўтган матбуот анжуманида 2022—2026 йилларда амалга ошириши лозим бўлган муҳим вазифа ва режалари ҳақида маълумот берди. Бу ҳақда «Дарё» мухбири хабар бермоқда.
ОКМК нодир ва қаттиқ қотишмалар ишлаб чиқариш бўйича илмий ишлаб чиқариш бирлашмаси директори Илҳом Асадовнинг айтишича, президент фармони ижроси юзасидан 2022–2024 йилларга мўлжалланган «Олмалиқ КМК» АЖ «Нодир металлар ва қаттиқ қотишмалар илмий ишлаб чиқариш бирлашмаси»ни ривожлантириш ва янги маҳсулотларни ўзлаштириш дастури ишлаб чиқилган. «Дастур ижроси бўйича амалий ишлар бошлаб юборилган.
Жумладан, I йўналиш – нодир металлардан юқори қийматли маҳсулотлар ишлаб чиқариш бўйича умумий қиймати 28,6 миллион долларлик 11 та лойиҳа доирасида ишлар олиб борилмоқда. Бу ишлар натижасида 23,4 миллион долларлик маҳсулот ҳажми ишлаб чиқилади. Шундан 23,1 миллион долларлик маҳсулот экспорт қилинади ва 165 та янги иш ўринлари ташкил қилинади»,–дейди Илҳом Асадов.
Таъкидланишича, айни вақтда комбинат томонидан Вазирлар Маҳкамасининг фармойиши ижросини таъминлаш борасида «Ингичка» волфрам конининг техноген чиқиндиларини қайта ишлаш, волфрам концентратини ажратиб олиш ҳисобига янги турдаги юқори қўшилган қийматли экспортбоп маҳсулотларни ишлаб чиқариш ишлари олиб борилмоқда.
«Дастурга мувофиқ, волфрам концентрати комбинатнинг «Нодир металлар ва қаттиқ қотишмалар ишлаб чиқариш бўйича» илмий ишлаб чиқариш бирлашмасига етказиб берилади. Ушбу йўналишда молибден ишлаб чиқаришни ошириш ишлари 2022 йилнинг апрель ойида бажарилади. Натижада йилига 400 тонна (17,2 миллион доллар) молибден ишлаб чиқарилишига эришилади. Шунингдек, нодир металлардан тайёр маҳсулотлар ишлаб чиқариш лойиҳалари 2022 йилнинг октябр ойида ишга туширилади», - дейди ОКМК нодир ва қаттиқ қотишмалар ишлаб чиқариш бўйича илмий ишлаб чиқариш бирлашмаси директори.
Илҳом Асадовнинг сўзларига кўра, мазкур йўналишдаги лойиҳалар амалга ошиши натижасида 11 та маҳсулот турлари (волфрам 3 оксиди, волфрам штабиги, молибден штабиги, волфрам карбиди, ВК, ТК маркали қаттиқ қотишмалар) ишлаб чиқарилади.
«Дастурнинг II йўналиши – мис асосида рангли металларни қайта ишлаш бўйича умумий қиймати 13 миллион долларлик 3 та лойиҳа амалга оширилиши белгиланган. Айни кунларда ушбу йўналишда бирлашмада Германиянинг «Фалк Порше Течник Гмбҳ» компанияси билан қўшма корхона ташкил этилди. Корхонада мис қотишмаларини (бронза, латун) ишлаб чиқариш лойиҳаси 2023 йил ноябрда, мисдан лента ва листлар ишлаб чиқаришни ташкил этиш лойиҳаси 2023 йил октябрда, мис ва унинг қотишмаларидан кукун ишлаб чиқариш 2024 йил февраль ойида ишга туширилади. Натижада 7 та янги турдаги 258 миллион долларлик маҳсулот ишлаб чиқарилиб, 145 та янги иш ўрни яратилади», - дейди у.
Қўшимча қилинишича, ушбу йўналишда шунингдек, «Фалк Порше Течник Гмбҳ» компанияси билан ташкил этилган қўшма корхонада умумий қиймати 19 миллион доллар бўлган 4 та лойиҳа ҳам амалга оширилади.
ОКМК нодир ва қаттиқ қотишмалар ишлаб чиқариш бўйича илмий ишлаб чиқариш бирлашмаси директори бу ҳақда гапирар экан, жумладан, шундай дейди: «Геокомпозит материалларни, композит шиша толадан маҳсулотларни ишлаб чиқариш, кимёвий чидамкор баклар ва вентиляция тизимларини ишлаб чиқариш, бакларни полимер материал билан қоплаш, рухланган пўлат симлар ишлаб чиқариш каби лойиҳалар 2024 йил август ноябрь ойларида ишга туширилиши кўзда тутилган. Мазкур лойиҳалар ишга тушиши натижасида 36,4 миллион долларлик 15 та янги турдаги маҳсулотлар ишлаб чиқарилади ва 155 та янги иш ўрни яратилади».
Дастурнинг III йўналиши –илмий ишланмаларга асосланган технологияларни жорий этиш бўйича умумий қиймати 8,7 миллион доллар бўлган 9 та лойиҳалар амалга оширилади. Ушбу лойиҳаларнинг амалга оширилиши натижасида йилига 26,6 миллиард сўмлик 12 та маҳсулот тури ишлаб чиқарилади.
«Лойиҳани амалга оширишда Жанубий Кореянинг КИРАМ нодир металлар илмий ишлаб чиқариш институти билан замонавий лаборатория ускуналари билан жиҳозлаш бўйича шартномалар имзоланди. Шунингдек, Ўзбекистон Фанлар академиясининг Умумий анорганик химия институти билан қўшма илмий текшириш лабораторияси ташкил этилади. Бу мақсадлар учун 1,2 миллиард сўм маблағ ажратиш ва илмий ишлар олиб бориш учун йўл хариталарини тузиш режалари келишиб олинди», – дейди Илҳом Асадов.
Дастурнинг IV йўналиши – фойдаланилмаётган ишлаб чиқариш майдонларида янги қувватларни ташкил этишга оид лойиҳалар доирасида умумий қиймати 13,55 миллион доллар бўлган 6 та лойиҳа амалга оширилиши режалаштирилган.
«Жумладан, юқори иссиқбардош керамик маҳсулотлар ишлаб чиқаришни ташкил этиш лойиҳаси 2024 йил февраль ойида, Аддитив технологиялар (3D принтер) учун кукун ишлаб чиқаришни ташкил этиш лойиҳаси 2023 йил ноябрь ойида, қурилиш учун қуруқ аралашмалар ишлаб чиқаришни ташкил этиш ҳамда янги турдаги маҳсулотларни ишлаб чиқаришга йўналтирилган лойиҳалари 2023 йилнинг март ойида ишга тушириш кўзда тутилган. Мазкур лойиҳалар ишга тушиши натижасида 90,58 миллион долларлик маҳсулот тайёрланиб, 277 та иш ўрни яратилади»,– дея қўшимча қилди ОКМК нодир ва қаттиқ қотишмалар ишлаб чиқариш бўйича илмий ишлаб чиқариш бирлашмаси директори.
2022–2025 йилларда саноат маҳсулотларини ишлаб чиқариш, экспортга йўналтириш, инвестицияларни ўзлаштириш, маҳаллийлаштириш, янги иш ўринларини ташкил этиш бўйича мақсадли кўрсаткичларга кўра, 2022–2025 йилларда 3 триллион 536 миллиард 600 миллион сўмлик саноат маҳсулотлари ишлаб чиқарилади. 182,8 миллион долларлик маҳсулотлар экспорт қилинади. Маҳаллийлаштириш дастури бўйича 1,5 миллиард сўмлик маҳсулот тайёрланади. Эътиборли жиҳат, 2022–2025 йилларда 385 та янги иш ўринлари яратилади.
«Нодир металлар ва қаттиқ қотишмалар ишлаб чиқариш бўйича илмий ишлаб чиқариш бирлашмаси томонидан 2022 йил январь июль ҳолатига кўра, 238 миллиард сўмлик саноат маҳсулотлари ишлаб чиқарилган ҳолда, режа 175,5 фоизга бажарилганини алоҳида таъкидлаш жоиз. 20,6 миллион долларлик маҳсулот экспорти амалга оширилиб, режа 357,7 фоизга уддаланган. Маҳаллийлаштириш дастури доирасида 42 та лойиҳа асосида 62 миллиард 735 миллион 200 минг сўмлик маҳсулот ишлаб чиқарилган. Бирлашма томонидан жорий йилнинг 7 ойида ишлаб чиқаришдан 115,8 миллиард сўмлик фойда олинган»,– дейди ОКМК нодир ва қаттиқ қотишмалар ишлаб чиқариш бўйича илмий ишлаб чиқариш бирлашмаси директори Илҳом Асадов.
Изоҳ (0)