Хоразм вилоятида кўриш қобилиятида нуқсони борлиги сабабли жавоблар варақасини тўлдиришга қийналган абитуриентга ёрдам берилди. Бу ҳақда Давлат тест маркази маълум қилди.
Қайд этилишича, Давлат комиссиясининг 2-сонли баёнида жисмоний ёки руҳий ривожланишида, кўриш ёки эшитишда нуқсони бўлган ногирон абитуриентларга тест топшириқлари китобини ишлашлари ва жавоблар варақасини бўяшларида қулайликлар яратилиши белгиланган.
Хусусан, 14 август куни 2-сменада Хоразм вилоятида ўтказилган тест синовларида 35-гуруҳдаги абитуриент Э.А.Сапоев кўриш қобилиятида нуқсони борлиги сабабли жавоблар варақасини тўлдириш учун ёрдам сўраган.
Ҳолат Давлат тест маркази ходимлари томонидан ўрганилиб, ҳақиқатдан ҳам абитуриентнинг кўриш қобилиятида нуқсони борлиги сабабли гуруҳ назоратчиси томонидан жавоблар варақасига тегишли жавобларни бўяш учун ёрдам кўрсатилган. Жараён гуруҳдаги барча абитуриентларнинг розилиги билан Давлат тест маркази ходимлари ва гуруҳ назоратчилари кузатуви остида амалга оширилган.
Аввалроқ Фарғонада ДТМ имтиҳонлари пайтида кўзида нуқсони бор 64 ёшли абитуриентга ёрдам кўрсатилган эди.
Изоҳ (0)