Президент Шавкат Мирзиёев 17–18 август кунлари Саудия Арабистонига ташриф буюради. Бу ҳақда 15 август куни президент матбуот котиби Шерзод Асадов иштирокидаги йиғилишда маълум қилинди, деб хабар бермоқда «Дарё» мухбири.
Шерзод Асадов давлат раҳбарининг жорий ҳафтадаги иш жадвали бўйича маълумот берди.
Ташриф дастурига мувофиқ Жидда шаҳрида олий даражадаги музокаралар бўлиб ўтади. Уларда мамлакатларимиз ўртасидаги кўп қиррали ҳамкорликни янада кенгайтириш масалалари муҳокама қилинади.
Алоҳида эътибор «яшил иқтисодиёт», юқори технологиялар ва рақамлаштириш, инновасиялар, кичик бизнес ва тадбиркорлик соҳаларига қаратилади.
Саммит якунида икки томонлама ҳужжатларнинг катта тўплами имзоланиши кутилмоқда.
Шунингдек, давлат раҳбари Саудиянинг етакчи компаниялари, нуфузли халқаро тузилмалар – Ислом ҳамкорлик ташкилоти ва Ислом тараққиёт банки раҳбарлари билан учрашув ўтказади.
Шу билан бирга президент Маккаи Мукаррама ва Мадинаю Мунавварани зиёрат қилади. Ушбу ташриф охирги 30 йилда Ўзбекистон президентининг Саудия Арабистонига биринчи ташрифи бўлади.
Изоҳ (0)