Миянинг қон томир касалликлари (шу жумладан инсульт) дунё миқёсида ўлимнинг иккинчи сабабидир. Бу кўп жиҳатдан касалликлар хавфини оширадиган умумий зарарли одатлар билан боғлиқ. Marie Claire нашри қандай одатлар инсульт эҳтимолини оширишини маълум қилди.
Кўп овқатланиш
Меъёрдан кўп овқатланиш ортиқча вазн ва семиришга тўғридан-тўғри йўлдир ва бу, ўз навбатида, инсульт хавфини сезиларли даражада оширади. Бригҳам анд Women’с Ҳоспитал доктори Тобиас Куртнинг маълум қилишича, ортиқча вазн ёки семириб кетиш билан инсультга чалиниш эҳтимоли ортади.
Қон босимини назорат қилмаслик
Юқори қон босими (гипертония) инсультнинг асосий сабабларидан биридир. «Гипертония овозсиз қотил деб аталади, чунки одамлар кўпинча унинг мавжудлигини билмайди, — дейди неврология профессори Бретт Куккиара. — Сиз буни ҳис қила олмайсиз. У оғриқ бермайди. Шунинг учун одамлар қон босимини мунтазам текшириб туриши керак. Бу жуда муҳим».
Спиртли ичимликлар ичиш
Спиртли ичимликлар ва инсульт хавфи ўртасидаги боғлиқлик узоқ вақтдан бери тиббиёт оламида аксиома бўлиб келган. «Кўпгина тадқиқотлар геморрагик ва ишемик инсульт хавфининг ортиши спиртли ичимликларни ҳаддан ташқари ичиш билан боғлиқлигини кўрсатди», — дейилади Строке журналида чоп этилган илмий мақолада.
Холестеринли маҳсулотларни истеъмол қилиш
Буларга қизил гўшт, транс ёғлари бўлган маҳсулотлар (хусусан, фастфуд), палма ёғи, кўплаб сут маҳсулотлари ва ширинликлар киради. Агар ёмон холестеринли маҳсулот жуда кўп истеъмол қилинса, у қон оқимида тўпланади ва томирларда қуйқалар пайдо бўлишига олиб келади. Бу эса инсультга тўғридан-тўғри йўлдир. Касалликнинг олдини олиш учун қондаги холестерин даражасини мунтазам текшириб туриш ва рациондаги зарарли маҳсулотлар сонини камайтириш тавсия этилади.
Изоҳ (0)