МИБнинг Самарқанд вилояти бошқармаси ва унинг қуйи бўлимлари томонидан 2022 йилнинг ўтган олти ойи давомида қарийб 3,5 триллион сўмлик 327 минг 714 та ижро ҳужжати юзасидан ижро тадбирлари амалга оширилган. Бу ҳақда бошқарма бошлиғи Меҳрож Насруллаев билан бўлиб ўтган матбуот анжуманида маълум қилинди, дея хабар берди «Дарё» мухбири.
Таъкидланишича, ижро ишларининг асосий қисми, яъни қарийб 1,2 триллион сўмлик 217 минг 166 та иш давлат фойдасига ундирувлар билан боғлиқ ижро ҳужжатлари ҳисобланади.
«Ўтган олти ой давомида бюронинг вилоят бошқармаси томонидан жами 1,8 миллиард сўмлик 121 минг 720 та ижро ҳужжати бўйича якуний қарорлар қабул қилинган бўлиб, шундан 72 минг 562 та ижро ишлари бўйича амалда 1 триллион сўм маблағлар ундирилган. Олти ойда мулкий ундирувларга оид ижро ишлари бўйича амалга оширилган мажбурий ижро тадбирлари натижасида давлат фойдасига 391,2 миллиард сўм, юридик шахслар фойдасига 463,5 миллиард сўм, жисмоний шахсларга фойдасига (алиментдан ташқари) 177,2 миллиард сўм маблағлар ундирилди», — дейди Меҳрож Насруллаев.
Мажбурий ижро тадбирлари жараёнида давлат фойдасига ундирилган 391,2 миллиард сўм маблағларнинг 335,2 миллиард сўмини солиқ ундирувлари, 1,5 миллиард сўмини жиноят натижасида давлатга етказилган зарар, 22,6 миллиард сўмини жиноий ва маъмурий жарималар, 16,4 миллиард сўмини давлат божлари, 15,5 миллиард сўмини қонунда кўзда тутилган бошқа турдаги мажбурий ундирувлар ташкил қилган.
Изоҳ (0)