Тошкент шаҳри ва Фарғона вилоятида ўқишга киритиб қўйиш ва ўқишни кўчириб беришни ваъда қилган шахслар ушланди. Бу ҳақда Иқтисодий жиноятларга қарши курашиш департаменти хабар қилди.

Бош прокуратура ҳузуридаги департаментнинг Тошкент шаҳри бўлими ДХХ ходимлари билан ҳамкорликда тезкор тадбир ўтказган. Унда фуқаро З.I. фуқаро Ғ.нинг ишончига кириб, уни танишлари орқали Ўзбекистон давлат санъат ва маданият институтига ўқишга киритиб қўйиши эвазига 7500 долларни олган вақтида ушланган. Унинг кўрсатувига асосан давом этган тадбирда ушбу институт катта ўқитувчиси Б.М. фуқаро З.I.дан 6000 долларни олган вақтида ашёвий далиллар билан ушланган.

Шунингдек, департаментнинг Фарғона вилояти бошқармаси томонидан ИИБ ходимлари билан ҳамкорликда ўтказилган тезкор тадбирда фуқаро З.Ў. фуқаро I.нинг қўшни Қирғизистондаги университетидаги ўқишини Фарғона давлат университетига кўчириб беришни 1500 долларга келишиб, шундан 1000 долларни қўлга киритиб, қолган 500 долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.