Саудия Арабистони Осиёдаги харидорлар учун нефть нархини рекорд даражага кўтарди. Бу ҳақда Bloomberg хабар бермоқда.
Иқтисодиётнинг секинлашуви хом нефть учун глобал талабга таъсир қила бошлаганига қарамай, Saudi Aramco келаси ойда Осиё нефтни қайта ишлаш заводларига етказиб бериш учун Аrab Light нархини бир баррель учун 9,80 долларга оширди.
Бу август ойига нисбатан 50 сентга баланд ва тарихдаги энг юқори нарх ҳисобланади.
Шунга қарамай, июль ойи охирида савдогарлар ва қайта ишлаб чиқарувчилар 1,50 доллардан баландроқ ўсишни кутган.
Арамcўнинг бу ҳаракати ОПЕК+ давлатлари АҚШнинг кўпроқ нефть сўраб олиб бораётган бир неча ойлик дипломатик саъй-ҳаракатларига ўз тарихидаги энг кичик ишлаб чиқариш ўсиши билан жавоб берганидан бир кун ўтиб амалга оширилди.
3 августда нефть нархи пасайиб кетди, Brent 4 фоизга тушиб, баррелига 100 доллардан пастга тушди, Ливияда эса нефть ишлаб чиқариш қайта тикланди.
Саудия Арабистони хом нефтнинг катта қисмини Осиёга сотади. Хитой, Ҳиндистон, Жанубий Корея ва Япония энг катта харидорлардир.
Арамcўнинг ойлик нарх бўйича қарорлари нефть бозорининг қўнғироғи сифатида кўрилади ва Форс кўрфазининг бошқа йирик ишлаб чиқарувчилари унга қараб нарх белгилайди.
Саудия компанияси оғир Осиё нефть турлари нархини енгилроқларга қараганда кўпроқ оширди. Оғирроқ турлар дизель каби ёқилғига айланади, енгилроқлари эса кўпроқ бензин беради.
Осиё нефтни қайта ишлаш корхоналарининг нефтни бензинга айлантиришдан оладиган маржаси июнь ойи охирида рекорд даражадан деярли 78 фоизга камайди. Дизель ёқилғисидан маржаси эса тахминан икки бараварга қисқарган.
Аввалроқ Саудия Арабистони июль ойида рекорд даражада нефть экспорт қилгани ҳақида хабар берилганди.