Ижтимоий тармоқларда Қашқадарё вилоятининг Китоб туманидаги вилоят 2-сонли асаб-руҳий касалликлар диспансерида айрим беморлар ерда ухлаётгани акс этган видео тарқалди. Вилоят Соғлиқни сақлаш бошқармаси видеодаги ҳолатга изоҳ берди.
«Аниқланишича, мазкур видеотасвир 2022 йил 4 июль куни Китоб туманидаги вилоят 2-сонли асаб-руҳий касалликлар диспансери болалар бўлими навбатчи санитаркаси Муқаддас Хўжматова томонидан тасвирга олиниб, муассаса бош шифокорига Telegram орқали тақдим этилган.
2022 йил 5 июль куни диспансер жамоасининг умумий йиғилишида мазкур ҳолат муҳокома қилиниб, беморларнинг ўз ўрнига ётишини таъминламасдан, назоратсиз қолдирган тўрт нафар ходимга меҳнат қонунчилигига асосан интизомий чора кўрилган. Йиғилишда бундай ҳолат бошқа такрорланмаслиги бўйича зарур чоралар белгиланган.
Шунингдек, шу гуруҳда юқоридаги фойдаланувчи томонидан диспансерда қўли шикастланган бемор аёлга тиббий ёрдам кўрсатилмаганлиги, у гипссиз юрганлиги қайд этилган.
57 ёшли бемор аёл Э.С. диспансерда ‘Д’ ҳисобда туради. Иккинчи гуруҳ ногирони, 2022 йил 1 апрелдан ҳозирги кунга қадар бу муассасада ётиб, даволаниб келмоқда. 2022 йил 3 июнь куни йиқилиб тушган. Шу куни чап қўл кафт соҳаси рентген қилиниб, травматолог шифокорга кўрсатилган. Чап қўл тўртинчи бармоқ ўрта фалангасининг ёпиқ синиб силжиши ташхиси қўйилган. Беморга мутахассис томонидан тегишли муолажалар қилинган. 2022 йил 27 июнь куни беморнинг қўли қайта рентген қилиниб, травматолог шифокор назоратидан ўтказилган. Суяклари битганлиги сабабли боғлов ечилган. Ҳозирда беморнинг аҳволи қониқарли», — дейилади расмий муносабатда.
Қўшимча қилинишича, диспансер биноси 2021 йил апрелда фойдаланишга топширилган. 150 ўринга эга бўлган муассасада беморларнинг даволаниши учун барча шароитлар яратилган.
Бошқарма ахборот хизмати Ўзбекистон Республикасининг «Психиатрия ёрдами тўғрисида»ги қонунида руҳияти бузилган беморларни уларнинг ўзи ҳамда қонуний вакилининг рухсатисиз фото, видео ёки кинотасвирга олиш мумкин эмаслигини эслатган.
Изоҳ (0)