Андижон вилоятининг Бўстон тумани мактабгача таълим бўлими мансабдорлари устидан жиноят иши очилди. Бу ҳақда «Дарё»га вилоят прокуратураси ахборот хизмати маълум қилди.
Аниқланишича, давлат боғчаларига таъминотчилик қилган тадбиркор ўз жонига қасд қилгани тўғрисидаги хабар эълон қилингач, Бўстон тумани прокуратураси туман мактабгача таълим бўлимида йўл қўйилган қонунбузилиш ҳолатлари юзасидан текширув ўтказган.
Текшириш давомида туман мактабгача таълим бўлими ҳамда мактабгача таълим ташкилотлари мансабдор шахслари томонидан ўзганинг жуда кўп миқдордаги мулкларни ўзлаштириш йўли билан талон-торож қилингани аниқланган.
Мазкур ҳолат юзасидан уларга нисбатан Жиноят кодексининг 167-моддаси 3-қисми «а» (ўзлаштириш ёки растрата йўли билан талон-торож қилиш) банди билан жиноят иши қўзғатилиб, ҳозирда тергов ҳаракатлари олиб борилмоқда. Жиноят иши бўйича тергов ҳаракатлари вилоят прокуратураси томонидан назоратга олинган.
«Дарё» мухбири тадбиркорнинг ўлими билан боғлиқ воқеаларга аниқлик қиритиш мақсадида марҳумнинг синглиси, МЧЖ таъсисчиси Наргизахон Саттарова билан суҳбатлашганди. Унинг таъкидлашича, боғчаларнинг марҳумдан 600 миллион сўмдан ортиқ қарзи бўлган. Маблағларнинг қайтарилишидан умидини узган акаси иши тўхтаб қолмаслиги учун банкдан кредит олган. Мактабгача таълим вазирлиги ахборот хизмати раҳбари Мавлуда Асқархўжаева ҳам ушбу ҳолат юзасидан видеобаёнот бериб, туман мактабгача таълим бўлими томонидан МЧЖ ҳисобига 925,6 миллион сўм маблағ ўтказиб берилгани маълум қилганди.
Изоҳ (0)