2022 йилнинг биринчи ярми якунларига кўра, Тошкентдаги «Ўзбекистон» меҳмонхонасининг соф фойдаси 116,6 миллион сўмни ташкил қилди. Бу Давлат активларини бошқариш агентлиги (ДАБА) маълумотларида қайд этилган.
Таққослаш учун, ўтган йилнинг шу даврида меҳмонхона 658,8 миллион сўм соф фойда олган. Шундай қилиб, пасайиш 5,6 баробарни ташкил этди.
2020 йилда меҳмонхонанинг давлат улуши Сингапурнинг Bashan Capital Pte компаниясига сотилган эди.
Компания икки йил ичида 23,2 миллион доллар, 1,5 йилда эса 100 миллиард сўм сармоя киритилиши керак эди. Яқинда бу шартларни бажариш муддати ўз ниҳоясига етди, аммо ДАБА маълумотларига кўра, меҳмонхона ҳали ҳам 80,1 фоизга давлатга тегишли. Бундан келиб чиқадики, меҳмонхона кўрган зарар ҳам давлат ҳисобидан.
Меҳмонхона сотуви ҳақидаги 2020 йилдаги хабар агентлик сайтидан олиб ташланган, бироқ Telegram каналидаги пост сақланиб қолган. Битим қайта кўриб чиқиши ёки бекор қилиниши ҳақида хабар берилмаган.
Бундан ташқари, Bashan Capital Pte интернетдаги маълумотларга кўра бир неча йил давомида ҳисоботларни эълон қилмаган ва унинг манзилида яна 500 та компания рўйхатдан ўтган.
Аввалроқ Тошкент вилоятидаги «Пирамида» дам олиш маскани 208 млрд сўмга сотилгани ҳақида хабар берилган эди.
Изоҳ (0)