Наманган, Самарқанд ва Бухорода ўқишга киритиш билан боғлиқ фирибгарлик ҳолатлари аниқланди

Ўзбекистоннинг бир қатор ҳудудларида ўқишга киритиб қўйиш билан боғлиқ фирибгарлик ҳолатлари фош этилди, деб хабар беради Иқтисодий жиноятларга қарши курашиш департаменти.

Қайд этилишича, Бош прокуратура ҳузуридаги департамент ҳамда ДХХнинг Наманган вилояти бошқармалари томонидан тезкор тадбир ўтказилган. Унда фуқаро О.Э. фуқаро А.нинг танишини Наманган давлат университетининг жисмоний маданият факультетига ўқишга киритиб қўйишни айтгани аниқланган. У эвазига 4 000 доллар ва 22 миллион сўм олган вақтида ашёвий далиллар билан ушланган.

Шунингдек, Самарқанд шаҳар бўлими томонидан ўтказилган тезкор тадбирда фуқаро Х.Н. бошқа бир фуқаро Ж.ни Самарқанд давлат университетига ўқишга киритиб қўйиш эвазига 2 000 доллар олган вақтида ушланган.

Бундан ташқари, Когон шаҳар бўлими томонидан ИИБ ходимлари ҳамкорликда тезкор тадбир ўтказилган. Унда фуқаро Н.Э. фуқаро М.ни 1,5 минг доллар эвазига танишлари орқали Бухоро шаҳридаги Жамоат саломатлиги техникумига ўқишга киритиб қўйишни ваъда қилгани аниқланган. У олдиндан 400 долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари ўтказилмоқда.