Россия Марказий банки нақд хорижий валютани ечиб олиш бўйича чекловларни яна олти ойга, 2023 йилнинг 9 мартигача узайтирди. Бу ҳақда регулятор хабар бермоқда.
Маълум бўлишича, келаси йилнинг март ойигача 10 минг доллар ёки евродаги нақд хорижий валютани ҳисоб ёки депозитдан ечиб олишнинг амалдаги чегараси сақлаб қолинади.
2022 йил 9 мартдан бошлаб ушбу имкониятдан фойдаланишга улгурмаган фуқаролар фақат 2022 йил 9 мартгача ҳисоб рақамига ёки депозитга тушган хорижий валютадаги пул маблағларини ечиб олишлари мумкин.
Қолган маблағларни ечиб олинган кундаги бозор курси бўйича рублда олиш мумкин. Чет эл валютасини чиқариш депозит ёки ҳисоб валютасидан қатъи назар, доллар ёки еврода амалга оширилади.
Россия банки Россия молия институтларига Ғарб давлатларида нақд пул олишни тақиқловчи Россияга қарши амалдаги санкциялар муносабати билан нақд пулга нисбатан шу ва бошқа чекловларни сақлаб қолишга мажбур, — дея тушунтирди Россия Марказий банки.
Бундан ташқари, 2023 йил 9 мартгача хорижий валютани сотиб олиш бўйича чекловлар ўз кучида қолади: банклар фақат 2022 йил 9 апрелдан кейин ўз кассаларига тушган евро ва долларларни фуқароларга сотиши мумкин.
Бошқа хорижий валюталарни сотишда ҳеч қандай чекловлар йўқ.
Шунингдек, маҳаллий компаниялар учун яна олти ойга, 2022 йил 9 сентябрдан 2023 йил 9 мартигача саёҳат харажатлари учун хорижий валютани олиш бўйича чекловлар узайтирилди — 5 минг доллар ёки евродан кўп бўлмаган миқдорда.
Изоҳ (0)