Бугунги кунда Боман Ирани Болливуддаги энг кўп даромад топувчи актёрлар қаторига киритилган. Ҳозир 62 ёшда бўлган актёр «Дон» фильмидаги салбий ролларни маҳорат билан ижро этибгина қолмай, комедия йўналишида ҳам яхши ижод қилган. Ажабланарлиси, Ирани ҳеч қачон актёр бўлишни режалаштирмаган. У улғайганида биргина орзусини амалга ошириш — онаси ва опа-сингилларига ҳеч нарсага муҳтож қилмаслик учун ҳаракат қилган.
«Отам мен туғилишимдан олдин, 28 ёшида буйрак етишмовчилигидан вафот этган. Онам ҳомиладорликнинг учинчи ойида эди. Отамнинг кичик бир новвойхонаси бор эди, унинг вафотидан кейин онам бу бизнесни юритиш бўйича барча масъулиятни ўз зиммасига олди. Опа-сингилларим мактабга боришарди ва мен жуда кичкина эдим, шунинг учун онам ишга кетаётганда мени руҳонийнинг хотини олдида қолдиришга мажбур бўлган», — дейди актёр.
«Болалигимда мен унинг учун қанчалик оғир бўлганини, қандай курашганимни ва учта синглимнинг ёлғиз қолганини кўрганман. Мактабда нутқ ва уни ўрганишда муаммоларим бор эди, жуда ёмон ўқирдим. Нутқимни яхшилаш учун онамга мени қўшиқ айтишга юборишни маслаҳат беришди. Бир куни онам менинг саҳнада қандай чиқишимни кўриш учун келди. Охирида у менга чалинаётган қарсакларни ёзиб олди. Мен одамларнинг қарсак чалаётганини тингладим ва бу менга ишонч бағишлади» , — дейди Боман Ирани.
«Мен театр ва санъатнинг бошқа турларига қизиқиб қолдим, фотографияни яхши кўрардим. Коллежни тугатгач, оиламга ёрдам беришни бошлашим кераклигини билардим, лекин қандай уддалашни билмасдим. Мен «Таж» меҳмонхонаси менежерига бориб, томдаги ресторанда ишламоқчи эканимни айтдим. У эса менга ‘Юқорига эришиш учун пастдан бошлаш керак’, — деди ва мени хона хизматига ишга юборди. Бир ярим йилдан кейин мен ресторанда официант бўлдим», — дейди актёр.
«Орадан кўп ўтмай, онам бахтсиз ҳодисага учради, мен ишдан бўшаб, оилавий бизнесимизни юрита бошладим. Шундай қилиб орадан 14 йил ўтди. Мен ота-онамнинг ишларини бошқардим, турмуш қурдим ва ҳатто иккита ўғил фарзанднинг отаси бўлдим. Бироқ мен ўзимга ёқадиган ишни қилмаётганимни, ҳаётимда нимадир нотўғри эканини ҳис қилдим. Турмуш ўртоғим Зенобия менга бу ишни тўхташим кераклигини, нима ёқишини ўйлаб кўришим кераклигини айтди», — дейди Болливуд юлдузи.
«Мен суратга олишни яхши кўрардим, отам ҳам фотограф эди. Шунинг учун мен бу соҳада ўзимни синаб кўришга қарор қилдим. Аввалига иш йўқ эди, лекин мен сабр қилдим ва ниҳоят муваффақиятга эриша бошладим. Ўшанда бир дўстим мендан реклама ролигида иштирок этишимни сўради. Ҳаракат қилдим ва улар мени танлади. Улар менга катта маош ҳам беришди», — дейди Боман Ирани.
«Мен реклама роликларини суратга олишга қарор қилдим, бир неча йил ичида 180 дан ортиқ реклама роликларини суратга олдим ва ҳаттоки машҳур спектаклларда ҳам рол ўйнадим. Мени ҳам қисқа метражли фильмга таклиф қилишди. Бу кичик бюджетдаги ва қўл камераси билан суратга олинадиган фильм бўлса ҳам мен учун бу ажойиб имконият эди», — дейди актёр.
«Менинг ҳаётим Видҳунинг студиясида фильмни монтаж қилаётганда ва бу фильмдан олинган парчани Винод Чопра кўрганидан кейин тубдан ўзгарди. У мен билан боғланиб, учрашишни таклиф қилди. Кўришганимизда у менга 200 минг рупийлик чек бериб, ‘Бу маблағ кейинги фильмимда суратга тушишинг учун’, — деди. Мен ундан кино ҳақида сўрадим, лекин у ҳали бу ҳақда билмаслигини айтди. У шунчаки машҳур бўлишимни хоҳламади ва лойиҳа қачон суратга олинишини ҳам айтмади», — дейди Боман Ирони.
«Айнан ўша пайтда ‘Муннабой: Бахт сотувчиси’ фильми суратга тушдим. Шундай қилиб, 44 ёшда менинг орзумдаги карьера бошланди. Бу менинг ҳаётимда кутилмаган нарса эди, мен ўзимга тақдим этилган имкониятдан фойдаландим ва уни қўлдан бой бермадим. Бу кўтарилиш ва пасайишларга тўла ажойиб саёҳат бўлди. Мен тушунган ягона нарса шуки, инсон ҳеч қачон ҳаётдан умидини узмаслиги керак ва энг муҳими, қайта бошлаш учун ҳеч қачон кеч эмаслигини билиши керак», — дейди Болливуд актёри.
«Мен актёрлик фаолиятимни 44 ёшимда, сценарий ёзишни 55 ёшимда бошлаганман, 62 ёшимда эса режиссёр бўлдим. Ёшнинг сизнинг эҳтиросингизга ҳеч қандай алоқаси йўқ, чунки вақт жадвалининг ҳар бир қисми — ҳаётингиз», — дейди Боман.
Боман Ирани Болливудга кириб келгунга қадар фотограф сифатида танилган. Театр ва реклама соҳасидаги тажриба унга катта ёрдам берди. Унинг кино оламдаги дебюти 2001 йилда суратга олинган ‘Ҳамма яхшиман дейди’ фильми бўлган. Актёр 2003 йилда ‘Ҳеч нарсадан қўрқманғ фильмида эпизод, бироқ таъсирли рол ўйнади ва бу мухлисларнинг эътиборини тортди. Шундан кейин у ‘Муннабой: Бахт сотувчиси’, ‘Мен ёнингдаман’, ‘Уч савдойи’, ‘Вир ва Зара’, ‘Яқин дўстлар’, ‘Блеф устаси’ ва бошқа кинофильмларда суратга тушди.
Боманнинг ўзининг энг яхши ролини 2009 йилда намойиш этилган «Қудуқ қазинг, дада!» фильмидаги роли деб билади, бироқ фильм мухлисларнинг эътиборига тушмади. «Ушбу рол томошабинларнинг меҳрига сазовор бўлмади, лекин ҳаммаси жойида. Мен ҳеч қачон ҳеч нарсадан афсусланмайман. Ҳар бир фильмнинг ўз тақдири бор. Бир марта Риши Капур менга шундай деган эди: ‘Уринг, лекин бошингизга тегмасин, муваффақиятсизликлар эса юрагингизга тегмасин. Ўзингизни қайта кашф қилинғ. Мен ҳам шунга ҳаракат қиляпман», — дейди актёр.
Изоҳ (0)