Тошкент шаҳрининг Учтепа туманида фуқарога боғ қилиш учун ажратилган ер дастлаб майда майдалаб ўзгаларга бериб юборилади. Кейинроқ қолган қисмини ҳам тадбиркорга ажратиш бериш ҳақида ҳокимлик қарор қабул қилади. Қарангки, боғбондан олинган ер интернет орқали сотувга ҳам қўйиб юборилган. Неча йилдан буён судма-суд югириб, тергов органлари эшиги олдида туришдан чарчаган Тешабой Азимов юқори турувчи органлардан адолатсизликка эътибор беришларини сўраб, «Дарё»га мурожаат қилди.
Учтепа тумани Қурувчилар кўчасидаги ташландиқ ётган бир гектар ерни 15 йил аввал Тешабой Азимовнинг оиласи чиқиндилардан тозалаб, боғ қилиш ҳаракатига тушади. Оила беш йил ерни тозалаб, обод ерга айлантиради. Шундан сўнг ер майдони туман ҳокимининг фармойиши билан оиланинг келини Шаҳноза Азимовага боғ ташкил этиш учун бириктириб берилади.
Ерни обод қилган оиладан ҳеч қандай рухсатсиз 2018 йилнинг март ойида Учтепа тумани ҳокими қарор қабул қилиб, Тешабой Азимовга тегишли боғ ҳудудининг 10 сотих қисмини «Remarkable polygraph service» жамиятига полиграфия маҳсулотларини ишлаб чиқариш корхонасини қуриш учун рухсат берган.
«Фарзандларим, набираларим ердан битталаб тошларни терди. Ерни мана шундай ҳолатга келтирганимизда унинг эгаси кўпайиб кетди. Униси келади, «Мен оламан,»деб, буниси келади. «Сен қанақа қилиб ерни оласан? Биз ахир уни тозалаганмиз», десак, «Йўқ, мен бу ерни ҳокимлик орқали оламан», дейди. Бизга берилган бир гектар-у етти сотих ердан мана ҳозир 20 сотих жой қолди. Участкалар қуриб олди. Бир одам йўқки, «Сен қандай қилиб жойни олдинг?», дегани. Дарахтларни кичик чақалоқни парвариш қилгандай сув қуйиб катта қилганман. Битта дарахтни кесишса, мен учун битта одам ўлгандай бўлади. Мен меваларни болалар уйига бераман. Ман уни бой бўлиб кетай, деб қилаётганим йўқ», — дейди Тешабой Азимов.
Мурожаатчиниг ўғли Фарҳод Азимов маълум қилишича, ерни суғориш мақсадида зовурдан оқиб ўтувчи сувга мотор ўрнатиб, тепага сув олиб чиқилган.
«Ҳозирги кунда боғда 200 дан ортиқ мевали дарахтлар бор. Дарахтларни шу ернинг халқи учун экканмиз. Боғнинг ёнида кўп қаватли уйлар бўлиб, бу ерда аҳоли зич жойлашган. Шу дарахтлар сабаб, аҳоли тоза ҳаводан нафас олиб, меваларни ейди. Ҳокимият давлат эҳтиёжи учун олинган, лекин бу ерга келаётган одамлар давлатнинг одамлари эмас. Бу ерни олган бошқа, қурилиш қилаётган одам бошқа. Ерни олиб ноқонуний сотиш ҳолатлари бўлмоқда. Полиграфия цехи қураман, деб келяпти. Буни мақсадини билиб қолдик, бу ерни олиб, тадбиркорлик қиламан, иш ўрни очаман, деб шу ерни ўзлаштириб, сотиб юбормоқчи экан. Буни бир танишимиз OLX’да кўрган» — дейди Фарҳод Азимов.
Ҳоким қароридан норози бўлган Тешабой Азимов Тошкент шаҳар поркуратурасига мурожаат қилган. Прокуратура ушбу масалани ўрганиб, 2019 йилнинг январида туман ҳокимлигига протест юборган. Унда «Пахтакор» маҳалласини таъмирлаш ҳисобига Тешабой Азимов томонидан барпо этилган боғ майдонидан тадбиркорга ер ажратиш ҳақидаги қарори ноқонуний эканини билдирган. Мазкур қарорнинг қабул қилинишида туман ҳокимининг 2017 йил июнидага қарори асос бўлган. Унда эса «Замонавий маҳалла» лойиҳаси асосида маҳалла маркази ҳамда савдо ва маиший хизмат шохобчаси қурилиши учун бошқа манзилдан қўшимча бўш ер майдони ажратиб берилиши белгиланмаган. «Пахтакор» маҳалла биносини қайта қуриш ва унинг атрофида ободонлаштириш ишларини олиб бориш учун аслида Уйғур кўчасидаги 12 сотих ер майдонини ажратиш назарда тутилган. Туман ҳокимининг қарорида ер участкасининг жойлашув манзили ва ер майдонинг ҳажми нотўғри кўрсатилган. Тешабой Азимов обод этган боғ майдони эса «Катта Қани» маҳалласи «Қурилиш» кўчасида жойлашган.
Прокуратура протестидан келиб чиқиб туман ҳокими 2019 йилнинг февралида тадбиркорга боғ майдонидан ер ажратиш ҳақидаги қарорини бекор қилиш бўйича қарор қабул қилган. Унга кўра, 2012 йилдаги фармойишда қайд этилган Шаҳноза Азимовага боғ ташкил этиш учун бир гектар етти сотих ер бириктирилсин, деган қисми ҳамда 2018 йилдаги «Пахтакор» маҳалласига ер майдони ажратиш ҳақидаги қарор бекор қилинган.
«Пахтакор» маҳалла фуқаролари йиғини раиси ҳамда Оқсоқоллар кенгаши 2020 йилнинг февралида Тошкент шаҳар прокуратурасига мурожаат йўллаган. Унда тадбиркорга Қурилиш кўчасидаги ер майдонини ажратиш бўйича 2019 йилдаги ҳоким қарорига ўзгартириш киритиб, қарорни мувофиқлаштиришда амалий ёрдам сўралган. Бундан ташқари маҳалла вакиллари туман ҳокимлигига мурожаат этиб, «Пахтакор» маҳалла биноси тадбиркор томонидан қуриб битказилган бўлса-да, унга ер ажратиш масаласи ҳал этилмаганини билдирган. Шундан келиб чиқиб, 2020 йилнинг февралида туман ҳокими «Remarkable polygraph service» жамиятига боғ ҳудудидан ер ажратиш бўйича иккинчи бор қарор қабул қилган. Бундан хабар топган Тешабой Азимов президент порталига мурожаат йўллаган.
Мурожаат Учтепа тумани прокуратураси томонидан кўриб чиқилган. Ўрганишлар натижасида ҳокимнинг мазкур қарорида «Пахтакор» маҳалласига ер ажратиш ҳақидаги қарор бекор қилинсин», деган сўзлар «Тадбиркорга боғ майдонидан 10 сотих ер берилсин мазмунидаги сўзлар билан аламаштирилгани аниқланган. Ушбу масала юзасидан прокурор туман ҳокимлигига протест келтирган. Унга кўра, ҳоким 2021 йилнинг августида тадбиркорга боғ ҳудудидан ер ажратиш бўйича қарорни иккинчи маротаба бекор қилган.
2022 йилнинг майида Учтепа тумани прокуратураси Тошкент шаҳар туманлараро маъмурий судининг 2022 йилнинг январь ойидаги ҳал қилув қарорини ўрганган. Туман прокуратураси суд қарорининг тадбиркор томонидан Учтепа тумани ҳокимлиги мансабдор шахсининг хатти-ҳаракатлари юзасидан берган аризасини қаноатлантириш ҳақидаги қисмини бекор қилиш бўйича Тошкент шаҳар маъмурий судининг апеляция инстатансиясига протест келтирган.
Шу йилнинг июнь ойида Учтепа тумани прокуратураси Тошкент шаҳар маъмурий судининг апелляция инстанциясига портестни қайтаришни сўраб ариза берган. Унда туман прокуратураси вакили Тошкент туманлараро маъмурий судининг 2022 йилнинг январь ойидаги қарорига биноан аризачи «Remarkable polygraph service» МЧЖнинг Учтепа туман ҳокимлиги мансабдор шахсининг хатти-ҳаракатлари устидан мурожаати юзасида кўрган маъмурий ишига нисбатан келтирган апелляциясини бекор қилишини сўраган.
2022 йилнинг 4 июль куни Тошкент шаҳар маъмурий суди апелляция инстанция судлов ҳайъати ажрим қарорини қабул қилган. Унда Учтепа тумани прокуратурасининг Тошкент шаҳар маъмурий судининг апелляция инстатансиясига киритган протести кўриб чиқилган. Суд қарорига кўра, Тошкент туманлараро маъмурий суди томонидан 2022 йил 11 январдаги ҳал қилув қарорига нисбатан Учтепа тумани прокурори томонидан берилган апелляция протести бўйича иш юритиш тўхтатилиши белгиланган.
«Дарё» мазкур ҳолат юзасидан «Remarkable polygraph service» жамияти раҳбари тадбиркор Шаҳбоз Ҳасановдан изоҳ олди.
Тадбиркор Учтепа тумани ҳокимлиги мансабдор шахсининг хатти-ҳаракатлари устидан Тошкент шаҳар туманлараро маъмурий судига ариза берган. 2022 йилнинг январь ойида суд иши кўрилиб, ҳал қилув қарори қабул қилинган. Қарорда келтирилишича, Президентининг 2021 йилдаги «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш тўғрисида»ги фармонига кўра, 2021 йил 1 августидан ҳокимят органларидан ер участкалар юзасидан қарор қабул қилиш ваколати олиб ташланган. Учтепа ҳокимининг 2021 йил август ойидаги тадбиркорга боғ ҳудудидан ер майдони ажратиш бўйича қарорни бекор қилишга ваколати бўлмаган. Шу ва бошқа маслалар келтирилиб, тадбиркорнинг судга берган аризаси қаноатлантирилган.
«2019 йили ‘Пахтакор’ маҳалласи биносини қуриб топширганмиз. Ўша пайтда ижарада туриб тадбиркорлик қилганимиз боис, соҳамизни кенгайтириш, каттароқ замонавий полиграфия корхонасини қуриш учун мурожаат қилганмиз. Лекин ҳозирда полиграфия цехига эҳтиёжимиз йўқ. Эндиликда ушбу ердан маиший хизмат кўрсатиш мақсадида фойдаланмоқчимиз. Бу ерга мехмонхона қуришни режалаштирганмиз. Чунки атрофимизда ҳеч қандай меҳмонхона йўқ. Давлат неча қаватга рухсат берса, шунга қараб қўшниларнинг розилиги билан қурилиш олиб борамиз.
Ушбу ерни сотувга қўяганимиз ҳақида ёлғон маълумот тарқатилган. Мен ерни сотувга қўймаганман. Бу шунчаки номимизни қоралаш учун уюштирилган.
2020 йилнинг июлида Учтепа туман прокурори «Пахтакор» маҳалласида «Замонавий маҳалла» лойиҳаси асосида маҳалла маркази ҳамда савдо ва маиший хизмат шохобчаси қурилиши учун бошқа манзилдан қўшимча бўш ер майдони ажратиб берилмагани ҳақида протест киритган. Унга қадар маҳалла ҳудудидан ер ажратиш бўйича бундай қарор борлигини билмаганман. Унга асосан туман ҳокимлиги қарорни бекор қилган. Шу сабабли Тошкент шаҳар туманлараро маъмурий судига мурожаат қилганман. Бу масалада ҳозирга кунда Тошкент шаҳар ҳокимлиги томонидан қарорга ўзгартириш киритилмоқда. Улар қурилган маҳалладан ташқаридаги ер майдонини бериш ҳам қонуний эканлиги бўйича илова қилмоқдалар. Чунки бу каби муаммолар шаҳарда жуда ҳам кўп. Тадбиркорлар давлат қўйган шартларни бажариб маҳалла биносини қуриб топшириб бўлишган. Икки йилдан буён Қурулиш кўчасида ажратилган ер майдони учун солиқларни тўлаб келяпман. Ушбу ер майдони «Remarkable polygraph service» корхонаси балансига киритилган.
2018 йили ер майдони бизга берилган пайтда «боғ дейдиган шароитда бўлмаган. Дарахтлари жуда ҳам кичик эди. 2022 йил июлда Тошкент шаҳар Экология қўмитаси ходимлари Учтепа туманидаги мурожаат бўйича текчирувга чиққан пайтда менга қўнғироқ қилишди. «Боғ ҳудудида жойлашган дарахтларнинг барчасига қандайдир кимёвий модда уларни қуритиш мқасадида суртилган», дейишди. Бундан бизни ҳеч қандай хабаримиз йўқ. Бу нафақат бизга ажратиб берилган ер майдони балки боғнинг қолган қисмига ҳам суртилган экан. 2022 йил майда Экология қўмитаси томонидан қанча ва қайси ўлчамдаги дарахтлар борлиги рўйхатга олинди. Менга қурилишга рухсат этилган майдондаги дарахтлар зарар етказмаган ҳолда кўчиришга ҳуқуқим борлигини айтишди. Тошент шаҳар ҳокимлиги ҳузурида дарахтларни зарарсиз кўчириш корхонаси бор экан. Улар ёрдамида дарахтларни боғнинг бошқа қисмига кўчирмоқчиман», — дейди тадбиркор Шаҳбоз Ҳасанов.
«Дарё» нашри Учтепа туман ҳокимлигидан изоҳ сўради.
Ҳокимликнинг бош юрист консулти Малик Чориевнинг таъкидлашича, Азимовларга «Қурилиш» кўчаси охиридаги ер майдони туман ҳокимининг 2012 йилдаги қарорига асосан бириктирилган. Ушбу қарорда тадбиркор ёки фуқарога яшаш майдонига туташ, қўшни ер майдонлари ободонлаштириш мақсадида берилиши назарда тутилганини айтди. Унга кўра, ер майдонида товуқхона, супа, автотураргоҳ қуриш тақиқланган. Қарорда аҳоли ерни ободнолаштириш, дарахт экиш каби умумий мақсадда фойдаланиши белгиланган. Туман ҳокимлиги вакили маълумотига кўра, 2019 йилга келиб «Обод маҳалла дастури»га биноан туман ҳокиминиг қарори асосида тадбиркорга боғ майдонидан ер ажратилган.
«Фармойиш бир марталик тартибда тадбиқ этилади, яъни унда давлат ва жамоат эҳтиёжлари учун зарурат туғилганда маҳаллий давлат ҳокимияти органи фармойиш асосида ажратилган ер майдонини бир марталик огоҳлантириш билан ўз заҳирасига қайтариб олиш масалалари белигланган. Уларга бир гектару етти сотих ер берилиши биринчи масала. Иккинчи масала, фармойишда «Ер майдонини бир умрлик эгалик қилиш, мерос қилиб қолдириш ҳуқуқлари билан ер майдонининг квадрат метрлари ўзгармайди», деган қоида мавжуд бўлмаган. Маҳаллий давлат ҳокимият органи давлат ва жамоат эҳтиёжи учун керакли қисмларини заҳирага олиб, йигирма сотих ер майдонини уларда қолдирилган», дейди Малик Чориев.
Учтепа тумани вакили шунигдек, Тешабой Азимов барпо этган 20 сотих ер майдонидаги мевали ҳамда манзарали дарахтларнинг тақдири ҳақида маълумот берди.
«Маълумки, экология ташкилоти бор. Ҳар бир дарахтни ноқонуний тарзда нобуд қилиш маълум миқдордаги жарималар қўлланилишига асос бўлади. Бу бўйича 2020 йили фақат зарурат туфайли дарахтларни кесиш, бино ва иншоотлар давлат ва жамоат эҳтиёжлари учун ер майдонларида жойлашган дарахтларни кесиш бўйича мараторий эълон қилинган. Ҳар қандай дарахтни нобуд қилишга нисбатан қонунда жаовбгарлик мавжуд», — дейди Малик Чориев.
«Дарё» воқеалар ривожини кузатиб боради.
Изоҳ (0)