Жамиятда банклар кредит берса, иқтисодиёт жуда ривожланиб кетади, деган нотўғри тушунчалар авж олган. Бу ҳақда Тошкент шаҳрида бўлиб ўтган матбуот анжуманида Марказий банк раиси Мамаризо Нурмуродов айтиб ўтди, дея хабар бермоқда «Дарё» мухбири.
Мамаризо Нурмуродовнинг айтишича, иқтисодий ўсиш учун кредит ягона ечим эмас.
«Бизда ‘банклар кредит бермаяпти, агар улар кредит берса, иқтисодиёт жуда ривожланиб кетади’, деган нотўғри тушунчалар авж олган. Бу макро нуқтаи назардан қараганда сал эгрироқ тушунча. Пандемия вақтида бутун дунёда одамларга 15 трлн доллар эквивалентида пул берилди. Лекин иқтисодий ўсиш кузатилмади-ку. Бир нарсани тўғри тушунишимиз керак, масалан, мен тадбиркорман. Кредит олишдан мақсадим нима? Ишлаб чиқариб, уни сотишга эҳтиёж борлигига ишонсам, шу ишни қиламан. Менга 0 фоизда кредит бериб, шу нарсани ишлаб чиқар десангиз, мен уни эртага сотишга ишонмасам, унга қўшимча харажат қила олмайман. Айтмоқчи бўлганим, иқтисодий вазият, яъни геосиёсий шарт-шароитлар ҳам бунга чамбарчас боғлиқ. Макроиқтисодий ўсиш кредитга бўлган эҳтиёжнинг ўсишини таъминловчи омиллардан ҳисобланади. Бутун дунёда репрессия кутилаётган пайтда унинг бизга таъсири бўлмайди деган хулоса қилиш нотўғри. Агар ҳамкорларимизда молиявий қийинчилик ҳолати бўлса, ўз-ўзидан унга сотадиган товаримизнинг бозори йўқолади. Ҳаммаси бир-бирига боғлиқ», — дейди ташкилот расмийси.
Мамаризо Нурмуродовнинг қўшимча қилишича, Марказий банк 3 та йўналиш асосида фаолият юритади.
«Марказий банкнинг асосий вазифалари, асосий функциялари «Марказий банк тўғрисида»ги қонунда аниқ қилиб белгилаб қўйилган. Биз ўзимизнинг фаолиятимизни учта йўналишга қаратиб амалга оширамиз. Биринчиси, нарх-наво барқарорлигини таъминлаш. Иккинчиси, банк тизимининг узлуксиз фаолиятини таъминлаш. Учинчиси, тўлов тизимининг узлуксиз ишлашини таъминлаш. Бевосита миллий валютанинг барқарорлигини таъминлаш иқтисодий барқарорлик билан боғлиқ», — деди раис.
Аввалроқ Мамаризо Нурмуродов банкоматида пул нақдлаштириш учун 3 фоизлик комиссия ушлаб қолаётган банк топилмагани, Uzcard ва Humo карталарини бирлаштириш ишлари давом этаётганини маълум қилганди.
Изоҳ (0)