Бухородаги хонадондан қарийб 50 млн сўмлик буюмларни ўғирлаб кетган шахслар орадан бир йил ўтиб топилди

Бухоро вилояти Когон туманида бир йил муқаддам содир этилган ўғрилик жинояти фош этилди, деб хабар беради вилоят Ички ишлар бошқармаси.

Қайд этилишича, Когон тумани ИИИБ томонидан берилган маълумотга кўра, 2021 йил 25 август куни соат 10:00 ларда номаълум шахс «Тараққиёт» маҳалласида яшовчи Н.Ф.нинг (1990 йилда туғилган) уйига ғайриқонуний равишда кирган. Унинг ётоқхонасидаги шкаф ичидан 20 турдаги тилла тақинчоқлар, 120 доллар, 5 000 рубль ва 250 000 сўмни яширин равишда ўғирлаб, жабрланувчига 49 550 000 сўм миқдорда моддий зарар етказган.

Ҳолат юзасидан Жиноят кодексининг 169-моддаси (ўғрилик) 2-қисми билан жиноят иши қўзғатилган. Бир қатор тезкор суриштирув ҳамда тергов ҳаракатлари олиб борилган. Аммо жиноят содир этган шахсларни аниқлашнинг имкони бўлмаган.

Орадан бир йил ўтиб, мазкур жиноятни Самарқанд вилояти Жомбой тумани Кўкгумбаз маҳалласида яшовчи А.О. (2000 йилда туғилган) ўзининг жиноий шериги Ж.Ф. (2000 йилда туғилган) билан олдиндан жиноий тил бириктириб содир қилгани аниқланган ва ашёвий далиллар билан қўлга олинган. Жиноий гуруҳ бошқа вилоятларда, шунингдек, Бухоро вилоятининг Бухоро туманида ҳам ўғрилик жиноятини содир этган.

Ҳозирда уларга қамоққа олиш тарзидаги эҳтиёт чораси қўлланилган ҳолда, бошқа жиноятларга алоқадорлигини аниқлаш юзасидан тергов ҳаракатлари давом эттирилмоқда.