Наманганда вилоятнинг туризм салоҳиятини оширишга қаратилган бизнес-форум бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Мазкур анжуманда Малайзиянинг Сабаҳ штатидаги 10 га яқин сайёҳлик компанияси ҳамда Наманганда туризм соҳасида фаолият юритаётган бизнес вакиллари иштирок этди.
Малайзиялик меҳмонлар Наманган вилоятининг туризм салоҳияти билан таништирилди. Ўз навбатида, Малайзия компаниялари ҳам мамлакатнинг туризм соҳасидаги имкониятларини тақдим этди.
Бизнес-форум доирасида Наманган вилояти Туризм ва маданий мерос бошқармаси ҳамда Малайзиянинг Funholiday Tours & Travel компанияси ўртасида ҳамкорлик меморандуми имзоланди.
B2B форматда бўлиб ўтган учрашувларда эса Наманган вилояти туризм бизнеси вакиллари малайзиялик ҳамкасблари билан мулоқотда бўлиб, ҳамкорлик ўрнатиш бўйича бир қатор келишувларга эришди.
«Анжуманда Наманган вилояти ва Сабаҳ штати ўртасида дўстлик алоқалари ўрнатиш масалалари ҳам кўриб чиқилди. Қолаверса, Намангандан Малайзияга чартер рейсларни йўлга қўйиш бўйича амалий таклифлар билдирилди», — дейди вилоят ҳокимининг туризм ва маданий мерос масалалари бўйича ўринбосари Ботир Нуриддинов.
Тадбирдан сўнг малайзиялик меҳмонлар учун «Султон Увайс Қароний» зиёратгоҳи ва «Ахсикент» очиқ осмон остидаги музейига саёҳат ташкил этилди.
Изоҳ (0)