Педагог ходимларнинг ҳуқуқ ва шаъни давлат ҳимоясида экани Конституция билан кафолатланмоқда

Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.

Унга кўра, педагог ходимларнинг ҳуқуқлари, шаъни ва обрў-эътибори давлат ҳимоясида экани кафолатланмоқда.

«Педагог ходимларнинг касбий фаолиятига аралашишга, шунингдек, уларнинг хизмат мажбуриятларини бажаришига монелик қилишга йўл қўйилмайди», — дейилади 41-моддага киритилаётган ўзгаришда.

Шавкат Мирзиёев 2022 йил 20 июнда Конституциявий комиссия аъзолари билан ўтказилган учрашувда «Устоз ва мураббийлар – билимларни, урф-одат ва анъаналар, маданиятимизни авлоддан-авлодга етказадиган буюк кучдир. Шундай экан, устозга бўлган юксак эҳтиром Конституциямизда ўз ифодасини топиши зарур.

Шунингдек, педагог ходимларнинг касбий фаолиятига аралашиш, уларнинг хизмат мажбуриятларини бажаришига тўсқинлик қилишга йўл қўйилмаслигини Конституция даражасида белгилаб қўйиш лозим» деб таъкидлаб, мазкур йўналишдаги устувор вазифаларни белгилаб берганди.

Тараққиёт стратегиясининг 4-йўналишида белгиланган мақсадларга кўра, ўқув ўринлари сонини 2026 йил якунига қадар 6,4 миллионгача етказиш, Олий таълим билан қамров даражасини 50 фоизга етказиш ва таълим сифатини ошириш аосий вазифа сифатида қўйилган. Ушбу мақсадларга эришиш биринчи навбатда педагог ходимларнинг ҳуқуқларини, айниқса уларнинг давлат ҳимоясида эканини, фаолиятига аралашишга йўл қўйилмаслигини Конституция билан кафолатлашни талаб қилади.

Мазкур қўшимчалар, педагог ходимларнинг ижтимоий қўллаб-қувватланиши, ўз касбий фаолиятини амалга ошириши, уларнинг ижтимоий мақоми ва обрўсини ошириш учун ташкилий-ҳуқуқий шарт-шароитлар яратиши, шунингдек, ўз ҳуқуқ ва қонуний манфаатларини амалга ошириш учун кафолатлар беришга хизмат қилади.