Баъзи одамларга машина ёки бошқа транспорт воситаларида ҳаракатланиш қийин, ҳатто қисқа масофаларга ҳам — узоқ сафарларда ҳам. Бунинг барчаси йўлда уларда кўнгил айниши, бош айланиши кузатилиши сабабли. Кўпинча 12 ёшгача бўлган болалар бундан азият чекади, лекин катталарнинг 5-10 фоизи ҳам бу ҳодисани бошдан кечиради. Grazia нашри нима учун транспортда бу каби ноқулайликда юз бериши ҳақида сўз юритди.
Тиббиёт терминологиясида транспортда кўнгил айниши кинетоз ёки ҳаракат касаллиги деб аталади, бу кўпчиликка денгиз касаллиги сифатида яхши маълум. Биринчи марта одамлар денгиз саёҳатлари пайтида бунга дуч келади. Кинетоз одам монотон тебранишлар таъсирида қолганда пайдо бўлади: бу беланчак, карусел, автомобиль, яхта ёки поездда ҳам бўлиши мумкин. Денгиз касаллигига олиб келадиган вестибуляр аппаратлар (бош ва гавда мувозанатини идора қиладиган орган)нинг ишдан чиқиши оддий механизмга эга. Ушбу органнинг рецепторлари тананинг турғун эканлиги ҳақида сигнал беради — одамнинг ўзи ҳаракат қилмайди. Аммо кўзлар кўради: атрофдаги ҳамма нарса ҳаракат қилади ва тебранади. Бу ҳолат бош айланиши билан кўнгил айнишини келтириб чиқаради.
Аммо саёҳат қилишни осонлаштириш мумкин. Бунинг учун сафардан бир неча соат олдин газланган ва спиртли ичимликларни истеъмол қилмаслик лозим. Транспортнинг ўзида одамлар билан суҳбатлашиш ёки мусиқа, радио тинглаш орқали чалғишга ҳаракат қилиш керак. Шунингдек, йўналишга қарши ўтириш тавсия этилмайди.
Кўнгил айнишида махсус таблеткаларни ёқтирмайдиганлар учун C витамини ва занжабилни синаб кўриш мумкин — бу нохуш аломатларни енгиллаштиради. Агар йўлда ўзингизни жуда ёмон ҳис қилсангиз, ухлаб қолишга ҳаракат қилганингиз маъқул. Тажрибали саёҳатчилар эса бундай йўловчиларга қўлга эластик тасма боғлашни тавсия этади. Шарқ табобатига кўра, бу ерда биологик фаол нуқта жойлашган бўлиб, у кўнгил айнишини енгиллаштиради.
Изоҳ (0)