Сурхондарёнинг Термиз шаҳрига 5 июль куни Афғонистон томондан 5 та снаряд келиб тушган эди. Кўп вақт ўтмай Афғонистон муваққат ҳукумати бу ҳужумни уюштирган жиноий гуруҳ қўлга олинганини эълон қилди.
Жиноятчиларни қўлга олиш жараёнида Қундузнинг Имом Соҳиб туманидаги Қанжағэ ҳудудида Ислом Амирлиги махсус бўлинмалари «Хаворижлар» марказини топиб, йўқ қилган. Ушбу операция давомида 3 нафар жиноятчи ўлдирилган, беш нафари тириклайин қўлга олинган. Уларнинг автомашиналари ва қуроллари мусодара қилинган.
Муваққат ҳукумат томонидан тақдим этилган видеода қўлган олинган хаворижийлардан бири ҳақиқатан ҳам улар Ўзбекистон томонига снаряд учирганларини тан олган.
«Кобулданмиз, Фарруҳ деган қўшним ҳам бор эди. Тожикистонни Хўжавор ҳудудига ҳам снарядларни биз учирганмиз. Ўзбекистон ва Тожикистон ҳудудига снарядларни учиришни қаршилик фронти билан биргаликда амалга оширдик. Улар бизга снарядларни етказиб берди. Биз машиналарга солиб, иккита ҳудудга учирдик», — дейди қўлга олинган жиноятчи.
Унинг таъкидлашича, жиноий гуруҳ Афғонистоннинг Хайратон ҳудудида жойлашган уйларнинг бирида яна снарядларни учириш учун тайёргарлик кўраётган вақтларида «Толибон» томонидан қўлга олинган.
Эслатиб ўтамиз, Термиз шаҳрига снарядлар тушганда портлашлар содир бўлмаган, бунинг натижасида инсон қурбонлари ва вайронагарчиликлар кузатилмаган. Тўртта хусусий уйга кичик зарар етган, бешинчи снаряд футбол майдонидан топилган. Топилган снарядлар сапёр бирлиги томонидан зарарсизлантирилган.
Ҳолат юзасидан сиёсатшунос Камолиддин Раббимов «Толибон» Афғонистондан Ўзбекистонга снаряд отганларни қўлга олиб, жазолашини билдиргани яхши янгилик, дея баҳолаган эди.
Изоҳ (0)