Тошкент давлат иқтисодиёт университетида профессор – ўқитувчилардан бири 120 млн сўм ойлик олган. Бу ҳақда университет ректори Қўнғиротбой Шарипов «Дарё» нашрига берган интервьюсида маълум қилди.
Қўнғиротбой Шариповнинг айтишича, олий таълим даргоҳида ўз устида ишлаган ўқитувчиларга юқори маош тўланмоқда.
«Ўқитувчилар ойлик-маоши сўнгги 4 йилдан буён камида 3 марта ошди. Масалан, бизнинг универтитетдаги профессорлар ҳозир 10 млн сўм маош олиши мумкин. Агар ўқитувчи илмий мақола ёзадиган бўлса, биз унга ҳар бир мақоласи учун 2 млн сўмдан 20 млн сўмгача қўшимча ойлик берамиз. Агар у инглиз тилини билса, маошига яна 100 фоиз «надбавка» қўшилади. Ўтган ойда биз ҳисобладик, 18–22 млн сўм ойлик олган профессорларимиз ҳам бор. Энг кўп маош олган профессорларимиздан бири 120 млн сўм маош олди. Албатта, ойлигининг ўзи 10-12 млн сўм бўлса, кейин KPI (самарадорликнинг асосий кўрсаткичлари) бор, қўшимча ишлагани учун, яъни нуфузли журналларда мақолалар чоп этгани сабабли юқори ойлик олган. Қандай қилиб 5 та нуфузли журналда мақола чиқарган дейиш мумкин? У мақолалари устида йиллар давомида ишлаган. Агар ўқитувчи яхши ишласа, ҳар ойда бир-иккита қўшимча мақола чоп этса, у ойига камида 20—40 млн сўм даромад олади. Бунақа соҳа деярли ҳеч қаерда йўқ», – деди ректор.
Қўнғиротбой Шариповнинг қўшимча қилишича, ўқитувчи маоши чет тилини билиши билан ҳам ўлчанади.
«Бизда оддий ўқитувчиларнинг ойлиги 4,5 – млн сўмдан бошланади. У ёғи, илмий мақолалар ёзса, чет тилларини билса, юқоридагилар билан бир хил ойлик олиши мумкин. Ҳозирда инглиз тили ёки бошқа бирор чет тилини биладиган ўқитувчлар ойлигига 100–120 фоизгача қўшимча қилиб беряпмиз. Агар ўқитувчи дунёда топ-300 таликка кирган унивеситетлар дипломига эга бўлса ҳам яна қўшимча пул олади. Бизда ишлайман деган ўқитувчига ҳамма шароит яратилган. Лекин ўзининг устида ишламайдиганлари ҳам бор. Улар доим: ‘даромадим йўқ, ойлигим оз, қийналдим’, деб шикоят қилади. Бундай одамлар ҳамма жамиятда бор. Биз барча ўқитувчилар билан 1 йиллик шартнома имзолаймиз. Йил охирида ўқитувчининг KPI’си 55 фоиздан кам бўлса, у билан шартномани давом эттирмаймиз», – дея маълум қилди университет раҳбари.
Изоҳ (0)