Уч марказий ҳимоячи, Месси эса янги позицияда. «ПСЖ» бош мураббийи жамоа тактик схемасини ўзгартирди

«ПСЖ»нинг янги мураббийи жамоанинг тактик схемасини ўзгартирди ва Лионель Мессига янги позиция топди.

Япониядаги мавсумолди сафар чоғида Кристоф Гальтье 3-4-1-2 схемасини синовдан ўтказмоқда, дея хабар беради L’Equipe.

Преснел Кимпембе, Маркиньос ва Серхио Рамос марказий ҳимоя учлигини ташкил этади.

Латерал позициясини Хуан Бернат ўрнини эгаллаган Нуну Мендеш ва Ашраф Ҳакими эгаллади. Майдон марказида Идрисса Гуйе ва Витиня тўп сурди, машғулотлар жараёнида кейинчалик бу позицияни Марко Вератти ва Леандро Паредес эгаллаган.

Килиан Мбаппе ва Неймар ҳужум жуфтлигини ҳосил қилади. Лионель эса улардан ортда, «10-рақам» позициясида жойлашади. Унинг вазифаси ҳужумни ярим ҳимоя билан боғлаш бўлади.

Эслатиб ўтамиз, 5 июль куни «ПСЖ» Кристоф Гальтьени жамоанинг янги мураббийи сифатида таништирди. «Ницца» собиқ мураббийи Маурисио Почеттинонинг ўрнини эгаллади.

Кристоф Гальтье бунгача «Марсель», «Сент-Этен» ва «Лилл»да ишлаган. 2020/21 йилги мавсумда «Лилл» билан биргаликда Франция чемпионлигини қўлга киритган. «Ницца» 2021/22 йилги мавсумда Лига 1 ни 5-поғона билан якунлади.