НАТОнинг собиқ бош котиби Россиянинг Украинадаги уруши яна қанча давом этишини тахмин қилди

Россиянинг Украинадаги уруши яна 4-6 ой давом этиши ва Корея уруши натижаларига ўхшаш «музлатилган можаро» билан якунланиши мумкин, — деди НАТОнинг Европадаги собиқ бош котиби Жеймс Ставридис. Бу ҳақда Business Insider маълум қилди.

«Мен бу ҳолатни Корея уруши каби тугашига, яъни сулҳга, икки томон ўртасидаги ҳарбийлаштирилган ҳудудга ва давом этадиган душманликка олиб келишини кўрмоқдаман», – дейди Ставридис.

Корея уруши 1950 йил июнь ойининг охиридан 1953 йил июль ойининг охиригача уч йилдан ортиқ давом этган. Расмий равишда томонлар тинчлик шартномасини имзоламадилар, мамлакат 53-параллел бўйлаб Шимолий ва Жанубий Кореяга бўлинган. Биринчисини СССР ва Хитой, иккинчисини АҚШ, Буюк Британия, Франция ва бошқа Ғарб давлатлари қўллаб-қувватлаган.

Россия махсус операцияси тўрт ойдан кўпроқ вақт олдин, яни 24 февраль куни бошланган. Март ойи бошида Россия мудофаа вазири Сергей Шойгу бу белгиланган мақсадларга эришилгунга қадар давом этишини айтган. Президент Владимир Путин, Украинани қуролсизлантириш билан гўёки Донбасс аҳолисини ҳимоя қилаётганини ҳамда бу ишини «денацификация» деб атаган. Бир ой ўтиб, апрель ойи бошида Кремль махсус операция «яқин келажакда» якунланишига умид билдирди. «Умид қиламизки, махсус операция яқин кунларда ўз мақсадларига эришади ёки Россия ва Украина делегациялари ўртасидаги музокаралар билан якунланади», — деди Россия президенти матбуот котиби Дмитрий Песков.

Шу билан биргаликда, Россия гвардияси бошлиғи Виктор Золотов март ойи ўрталарида «махсус операция биз хоҳлаганчалик тез ўтаётгани йўқ», — деб айтган эди. У бу ҳолатни «нацистлар тинч аҳолининг орқасига яширинганлиги» билан изоҳлади. Май ойида Беларусь президенти Александр Лукашенко ҳам шунга ўхшаш фикрни билдирган эди: «Мен буни шундай ҳис қиляпманки, бу операция чўзилиб кетган». У бир вақтнинг ўзида «муаммога унчалик берилмаганлигини» ҳам таъкидлаган. Бунга жавобан эса Кремль махсус операция режа бўйича кетаётганига ишонтирди.

Июнь ойи охирида Путин, махсус операцияни ўтказиш вақтида жанговар ҳаракатлар интенсивлигини таъминлаш учун йўқотиш хавфига қарамай ҳарбийларни бу ишга ундаш нотўғри бўлишини айтди. «Албатта, мен Олий қўмондонман, лекин ҳали ҳам Бош штаб академиясини тугатмаганман. Мен профессионал одамларга ишонаман», — дея қўшимча қилди президент.

Мавзуга доир: 

• Путин Украинадаги махсус операциянинг туб мақсадини маълум қилди ва унинг муддати ҳақида гапирмасликни таклиф этди.
• CNN: АҚШ давлат котиби Украинадаги уруш 2022 йил охиригача давом этади деб ҳисобламоқда