Конституцияга киритилаётган ўзгариш: Тарихий, маънавий, маданий ва табиий мерос давлат муҳофазасидадир

Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.

Унга кўра, тарихий, маънавий, маданий ва табиий мерос давлат муҳофазасида экани Бош қомусимизда белгилаб қўйилмоқда.

«Давлат ва жамият миллий қадриятларни ҳимоя қилиш, Ўзбекистон халқи маънавий ва маданий меросининг узлуксизлигини таъминлаш тўғрисида ғамхўрлик қилади», — дейилади 49-моддага киритилаётган ўзгаришда.

Президент томонидан Конституция куни байрами муносабати билан йўлланган табрикда «Конституцияни ислоҳ қилиш бўйича кўрсатиб берилган 9 та йўналишнинг тўртинчиси, яъни Бош қомусимизда эзгу инсоний қадриятларимизни келгуси авлодларга безавол етказиш вазифасидан ҳам келиб чиқади» дейилган.

Ўзбекистоннинг табиий меросини сақлаш ва унинг келгуси авлодларга безавол етказилишини таъминлаш, табиий экологик тизимларнинг таназзулга учраши суръатларини пасайтириш ва биохилма-хилликни сақлаб қолиш мақсадида 49-моддага фуқароларнинг мажбурияти сифатида табиий меросини авайлаб асрашни ҳам киритиш таклиф этилмоқда.

Халқимизнинг бой тарихи ва маданий меросини муҳофаза қилиш, илмий ўрганиш, тарғиб қилиш ва бойитиб бориш борасида мамлакатимизда қатор ишлар амалга ошириб келинмоқда.

Жумладан, Ўзбекистон Республикасининг «Маданий мерос объектларини муҳофаза қилиш ва улардан фойдаланиш тўғрисида» ҳамда «Археология мероси объектларини муҳофаза қилиш ва улардан фойдаланиш тўғрисида»ги қонунлари қабул қилинди. Умумжаҳон маданий ва табиий меросни муҳофаза қилиш тўғрисида конвенция ратификасия қилинди.

Ушбу конвенция доирасида Хива, Бухоро, Самарқанд ва Шаҳрисабз шаҳарларининг тарихий марказлари ЮНЕСКОнинг Умумжаҳон мероси рўйхатига киритилди.