Афғонистон жанубида вабо касаллиги оқибатида бир кеча-кундузда 40 киши вафот этгани ҳақида хабар берилган эди. Санитария-эпидемиология хизмати ушбу касалликнинг кириб келишини олдини олишда кўрилаётган чоралар ҳақида маълумот берди.
Қайд этилишича, касалликларни четдан кириб келишини олдини олиш мақсадида республика бўйича бугунги кунда давлат чегараларини кесишиш жойларида 54 та санитария-карантин пунктлари (СКП) фаолият кўрсатиб келмоқда. Шулардан 36 таси автомагистрал йўлларида, 11 таси халқаро аэропортларда, 6 таси темир йўл ва 1 таси дарё портида ташкил этилган.
Ўзбекистон ҳудудига чегарадан кириб келаётган йўловчиларни тиббий-санитария кўригини яхшилаш мақсадида барча халқаро аэропортлар ва автомагистрал йўлларда жойлашган йўловчи ўтиш оқими юқори бўлган СКПлар замонавий тепловизорлар ва контактсиз термометр (пирометр)лар билан етарлича таъминланган.
Шунингдек, маълум қилинишича, юқумли касалликлар шифохоналарида, орал-регидратация пунктларида ўткир диареяга чалинган беморларни соғлиқни сақлаш вазирининг амалдаги буйруқлари талаблари асосида вабога текширилиши ташкил этилган.
Касалликнинг мавсумида ҳар беморлар юзасидан чуқур эпидемиологик суриштирув ишлари ўтказилмоқда. Санитария-эпидемиология хизматининг махсус лабораториялари вабо касаллигини ташҳисоти бўйича керакли жиҳозлар, реактивлар ва озуқа муҳитлари билан етарли миқдорда таъминланган. Лаборатория мутахассисларини қайта тайёргарликдан ўтказилган.
Ҳар ҳафта очиқ сув хавзаларидан намунлар олиб, вабо чақирувчиларига текширилиши амалга ошириб келинмоқда (НАГ ва АГ вибрионларга). Касалликка чалинган (гумон қилинган) беморларни юқумли касалликлар шифохонасига ётқизиш мақсадида шифо-ўринлари захираси ташкил этилган. Вабо касаллигига чалинган беморларини даволаш ишларини ташкил этиш учун зарур дори воситалари захирасини яратилган.
Бундан ташқари, давлат чегара-божхона постларидаги санитария-карантин пунктлари томонидан касалланиш тарқалган қўшни далватлардан ташриф буюрадиган фуқароларнинг тиббий назорати кучайтирилган.
Вабо — вибрио чолераэ микроорганизми келтириб чиқарадиган, ўткир инфекция. Касаллик диарея билан кечади, бу сувсизланиш ва қон томирлари етишмовчилигини келтириб чиқаради. Кўпинча инфекция ифлосланган сув ёки денгиз маҳсулотлари орқали юқади.
Изоҳ (0)