Ўзбекистонда 6,6 миллион ўқувчи янги ўқув йилидан бошлаб ягона мактаб формасига ўтиши кутилмоқда. Бу ҳақда Халқ таълими вазирлиги томонидан «Ўзтўқимачиликсаноат» уюшмаси билан ҳамкорликда Наманганда ташкил этилган пресс-тур давомида маълум қилинди, дея хабар беради «Дарё» мухбири Азизбек Абдувалиев.
ОАВ вакиллари ва блогерлар Наманган шаҳридаги «Даштбоғ» кичик саноат зонасида жойлашган тўқимачилик корхоналари фаолияти билан яқиндан танишди.
Танишув давомида мактаб формаларининг белгиланган стандартлар асосида тайёрланиши, матолар сифати, бичими, ранги, тикилиш услублари, турли ёш, бўй ва вазнга эга ўқувчиларга мос келиши ҳақидаги мисол ва маълумотлар тақдим этилди.
Халқ таълими вазирлиги бошқарма бошлиғи Жамолиддин Фозиловнинг билдиришича, «Ўзтўқимачиликсаноат» уюшмаси томонидан вазирликка мактаб формаларини тайёрлаш имконияти ва тажрибасига эга 560 дан ортиқ тўқимачилик корхонаси рўйхати тақдим этилган. Вазирлик ишлаб чиқарувчиларнинг нарх сиёсатига аралашмайди, улар ўзларининг харажатлари ва мавжуд талабдан келиб чиқиб, мактаб формалари учун нарх белгилайди. Шу билан бирга, ўқувчилар орасида камхарж оилалар фарзандлари ҳам борлиги инобатга олинган.
«Ҳисоб-китобларимизга кўра, мамлакатда 414 мингдан ортиқ ўқувчининг оиласи мактаб формаларини харид қилишда молиявий муаммоларга дуч келиши мумкин. Уларга маҳаллий бюджетнинг қўшимча манбалари ҳамда ‘темир дафтар’, ‘аёллар дафтари’ ва ‘ёшлар дафтари’ жамғармалари маблағлари ҳисобидан мактаб формаларини бепул олиб бериш кўзда тутилган», — дейди Жамолиддин Фозилов.
«Ўзтўқимачиликсаноат» уюшмаси дизайнерлик ишланмаларини жорий этиш бўлими бошлиғи Камола Ғуломованинг айтишича, мактаб формаларининг шакл-шамойили борасидаги изланишлар 2017 йилдаёқ бошланган ва қисқа вақт давомида уларнинг юздан ортиқ кўриниши яратилган. Ушбу дизайнерлик ишланмаларидан 10 таси танлаб олинган ва қишлоқ шароитида Сирдарёда, шаҳар шароитида эса Тошкентда синаб кўрилган. Ўқувчилар ва уларнинг ота-оналари ўртасида уларнинг қулайлиги, сифати, ювилиш хусусиятлари бўйича сўровномалар ўтказилган.
«Биз биринчи галда мактаб формаларининг болалар учун безарар бўлишига эътибор қаратдик. Тасдиқланган талабларга кўра, қуйи синф ўқувчиларининг кийимида 35, юқори синф ўқувчилари кийимида эса 50 фоизгача сунъий мато ва толалар қўлланиши мумкин. Ўтган йиллар мобайнида Ўзбекистонда ишлаб чиқарилган матоларнинг сифати ҳам анча ўзгарди. Шу сабабли маҳаллий матолар асосида мактаб формалари тикаётган корхоналаримиз сафи кенгайди», — дейди Камола Ғуломова.
Тадбирда таъкидланишича, 2022 йил 10 августдан бошлаб шаҳар-туман марказлари ва бевосита таълим муассасаларининг ўзида мактаб ярмаркалари ўтказилиб, мактаб формалари савдоси ташкил этилади.
Мавзуга доир:
Изоҳ (0)