Хонанда, композитор Бахтиёр Раҳмонов «Shok.uz» YouTube-каналига берган интервьюсида Манзура билан муносабати, Гулнора Каримова ва у ҳақидаги миш-мишлар ҳақида, Ўзбекистоннинг биринчи президенти Ислом Каримовнинг вафотига бағишланган қўшиқни қандай қилиб бир кунда тайёрлагани, Асал Шодиева унинг клипига бепул тушишини айтгани, касал бўлиб кўчага чиқолмагани, битта мусиқани қанчага ёзиб беришини айтди.
Бахтиёр Раҳмонов Манзура билан муносабатлари ҳақида
«Манзурани опамдек кўраман. Улар билан 6-7 йил, умуман олганда, 10 йилдан бери танишмиз. Бир-биримизникига меҳмонга бориб турамиз. Уларнинг клипида менинг фарзандим рол ўйнади», — дейди хонанда.
Гулнора Каримова хонандага ҳомийлик қилганми?
«Гулнора Каримова менга ҳомийлик қилмаган, бир тийин ҳам бермаган. Тадбирларга келадиган бўлсак, таклиф қилишган, борганман. Ҳеч қандай гонорар ҳам олмаганман. Қўшиқларимни ўзим басталаб куйлаганман. Ижодимнинг бошида Шекспирнинг шеърларига, Навоий ғазалларига мусиқа басталаганман. Гулнора Каримова «Қуёш порламоқ учун» номли таронани ҳам совға қилмаган. Ушбу қўшиқнинг шеърини менга беришган, бошида икки-уч қаторлардан ташкил топган эди. Бу қўшиқни бошида Шекспирнинг бир сонетига атаб ёзганман. Инглизчасига, русчасига айтиб кўрганман. Кейин эса «Қуёш порламоқ учун» таронаси икки-учта шеърнинг бирлашган вариантидан яралди», — дейди Бахтиёр Раҳмонов.
Ислом Каримовга аталган қўшиқ
«Бу бир кунда тайёрланган қўшиқ эмас. Ушбу шеърга 2013—2014 йилларда қўшиқ ёзилган эди. Шеър «Узоқроқ яшанг» деб номланаган эди ва шоир Эшқобил Шукур қаламига мансуб бўлган. Аслида у 90 йилларда устидан бензин қуйиб ёққан аёлларга бағишланган шеър эди. Мен 2014 йилда мусиқа басталаганман. Шунда асли сурхондарёлик бўлган шоир Эшқобил Шукур менга 90 йилларда устидан бензин қуйиб ёққан аёллар ҳақида гапириб берган. Ўзим ҳам шундай ҳолатларнинг гувоҳи бўлганман. Бирорта қариндошим ёки яқиним билан бунақа воқеа кузатилмаган, лекин шундай ҳолатлар бўлган. Ислом Каримовнинг вафотидан бир икки кун олдин менга шу шеърга 1-2 кунда қўшиқ тайёрлашимни айтишган. Кейин шеърни қайта тўғирлаб беришгандан кейин менга ёқди ва қўшиқ куйладим», — дейди у миш-мишларга жавобан.
Асал Шодиева «Эшикка суяниб жилмайган аёл» клипидаги иштироки учун пул олмаган
«Асал бу клипда ўзим рол ўйнайман деган. У турмуш қургандан кейин унча гаплашганим йўқ. ‘Эшикка суяниб жилмайган аёл’ қўшиғи ҳали тайёр бўлмасидан, студияда ёзилмасидан олдин гитара билан ижро қилган вақтимда Асалга ёққан. Агар шу мусиқага клип оладиган бўлсанг ўзим рол ўйнайман деган таклифни билдирган. Биз яқин дўст эдик. Клип яратилиши ҳақидаги хабарни эшитган ва ўзи рол ижро этишини билдирган. Клипнинг сюжети ҳам Асалга мослаб олинган», — дея маълум қилди хонанда.
5-6 йил тўшакка михлаган касаллик
«Ҳақиқатан ҳам шунақа касал бўлганман, энди тирик жоннинг иситмаси бўлади. Неврология билан боғлиқ касаллик эди. Ҳозир аҳволим яхши. Бу касалликка чалинганимдан кейин 5-6 йил давомида уйда ҳам, клиникада ҳам даволандим. Мусиқадан четлашишимга ҳам шу касаллик сабабчи бўлди. Сабабсиз шунақа касаликка чалиндим. Ҳозиргача нимага бунақа бўлганини билмайман. Ўтган йили концерт берганимда вилоятлардан менга қўнғироқ қилишди. Сизнинг шунақа касалликка чалинганингизни эшитдик, яхши бўлиб кетдингизми, концерт қўяётган экансиз дейишди. Кейин битта аёл менга менинг қизим деворни ушлаб юрибди, фарзанди бор деди. Кейин мен ундан қизининг ошқозони оғриши ёки оғримаслиги ҳақида сўрадим. У ҳа, оғрийди деб айтди. Мен эса врач ёзиб берган дориларни ичганидан кейин шунақа бўлдими, деб сўрадим ва аёл бунга ҳам ҳа деб жавоб берди. Дориларни қайси шифокор ёзиб берганини сўрадим, у эса қайсидир машҳур шифокорнинг исмини айтди. Ўша врачга менинг номимдан салом айтинг, у катта хато қилибди, ҳеч қачон мана шу дорини сув билан ичиш керак эмас, ошқозонни ҳам ўйлаш кераклигини ва дорини сут ёки кисел билан ичиш кераклиги ҳақида гапирдим. Айниқса гормонларни сув билан ичиш мумкин эмас. Балки бу касаллик Ўрта Осиё иссиқ иқлимли бўлгани учун биздан йироқ касаллик бўлгандир, ҳозир ҳам кўп учрамайди», — дейди у.
Шунингдек, хонанда битта қўшиқни 2000-3000 долларга ёзиб беришини ҳам айтиб ўтган.
Мавзуга доир:
Изоҳ (0)