Чанқоқ организмнинг муҳим сигналидир, уни эътиборсиз қолдирмаслик керак. Баъзида бу жиддий касаллик аломати ҳам бўлиши мумкин. «Новий очаг» нашри чанқоқни келтириб чиқарувчи 7 сабабни маълум қилди.
Тузнинг меъёрдан ортиши
ЖССТ маълумотларига кўра, бугунги кунда аксарият инсонлар ўзига керак бўлгандан ўртача икки баравар кўп туз истеъмол қилади. Маҳсулотлар таркибидаги яширин натрий, шунингдек, нотўғри овқатланиш ҳам бунга сабаб бўлади. Туз том маънода ҳужайралардан сувни чиқаради ва организм кучли ташналикни бошдан кечиради. Аммо шуни ёдда тутиш керакки, чанқоқ сигнали қабул қилинганда, организмда аллақачон меъёрнинг учдан бир қисми сувсизланади. Шунинг учун вазиятни ушбу даражагача келтирмасдан, рационни қайта кўриб чиқиш, ҳар куни истеъмол қилинадиган туз миқдорини текшириш ва кун давомида сув ичишни унутмаслик керак.
Оғир машғулот
Фаол ҳаёт тарзини олиб бора бошлаган инсонлар суюқликка бўлган эҳтиёж ортиб боришини унутмаслиги керак. Агар суюқлик ичиш аввалгидек давом этса, организм сувсизланиб қолиши мумкин. Жисмоний машқлар пайтида сув ичишни унутмаслик ва ҳар куни ичадиган суюқлик миқдорини ошириш лозим.
Қуёшда қолиш
Шунчаки қуёшли кунларда юришда ҳам сувсизланиш кузатилиши мумкин. Бунга йўл қўймаслик учун доимо ёнда бир шиша сув олиб юриш ва вақти-вақти билан, ҳатто чанқоқ кузатилмаса ҳам, бир неча қултум ичиш тавсия этилади. Бу суюқлик мувозанатини сақлашга ёрдам беради.
Қандли диабет
Агар одатдагидан тез-тез ҳожатхонага бориш ва доимо ташналик кузатилса, қондаги глюкоза даражасини текшириш керак. Бунда қандли диабетдан олдинги ҳолат ёки ҳатто диабет ривожланаётган бўлиши мумкин. Агар сув аввалгидек миқдорда ичилса, рацион ёки фаоллик даражаси ошмаган ҳолатда доимо чанқоқ кузатилса, албатта, эндокринологга мурожаат қилиш лозим.
Ксеростомия
Ксеростомия ёки оғиз қуриши — оғиздаги сўлак безлари етарли миқдорда суюқлик ишлаб чиқаришни тўхтатганда пайдо бўлади. Ушбу ёқимсиз ҳолатдан халос бўлиш учун кўпроқ сув ичишга тўғри келади. Шунинг учун вақтни ўтказмасдан шифокорга мурожаат қилиш тавсия этилади.
Анемия
Доимий чанқоқни келтириб чиқариши мумкин бўлган яна бир касаллик — бу анемия. Бундан ташқари, чанқоқ қанчалик кучли бўлса, касаллик ҳам шунчалик жиддий бўлади.
Дори воситалари
Бир қатор дорилар суюқлик мувозанатига таъсир қилиши ва чанқоқ ҳиссини келтириб чиқариши мумкин. Масалан, диуретик ва антиколинергик препаратларнинг ножўя таъсири доимий чанқоқ ҳиссини қўзғатиши мумкин.
Изоҳ (0)