Хитойнинг Ухань университетида вабо (холера) билан касалланиш бўйича битта ҳолат аниқланди, бемор касалхонага ётқизилгач, унинг аҳволи барқарорлашди, инфекция симптомлари ўтиб кетди, деб ёзади «РБК» Ухань тумани соғлиқни сақлаш бошқармасига таяниб.
Муассаса хабарига кўра, бемор диарея, қайт қилиш ва иситмадан шикоят қилган. Маҳаллий ҳукумат беморнинг яқинларини тестдан ўтказган ва у бўлган жойларни текширган, бироқ инфекция юқиши билан боғлиқ бошқа ҳолатлар аниқланмаган.
Sohu портал қайд этишича, вабо муҳандислик факультети аспирантида аниқланган, учта ётоқхонадан 254 нафар талаб ава 15 нафар сотувчидан таҳлил учун намуналар олинган. У икки хонадоши ҳамда биргаликда овқатланган яна бир киши билан яқин мулоқотда бўлган, улар карантинга жойлаштирилган.
Тадқиқотчилар ҳисоб-китобларига кўра, дунёда ҳар йили 1,3 миллиондан 4 миллионгача вабо билан касалланиш ҳолати ва 21—143 мингта ўлим ҳолати аниқланади. Агар даволанмаса, касаллик беморнинг бир неча соат ичидаги ўлими билан тугайди, деб огоҳлантиради Жаҳон соғлиқни сақлаш ташкилоти. Касаллик қўзғатувчи бактерия тушган овқат ва сув орқали тарқалади ҳамда кучли диарея ва сувсизликни келтириб чиқаради.
Хитойда вабо энг юқори, А синфидаги касалликларга киради (ўлат ҳам шу гуруҳга тааллуқли). Ўтган йили Хитойда ўлат билан касалланиш бўйича битта, вабо билан эса бешта ҳолат аниқланган.
Изоҳ (0)