Кейинги пайтларда эски қўшиқларни cover услубида айтиш урфга айланди. Эски ёки бироз унтилган қўшиқларнинг янгича ижроси ёшларга маъқул келмоқда. Ретро қўшиқларни янгича ижроси баъзи тингловчиларга ёқмаса-да, улар орасида муваффақиятли чиққан cover’лар ҳам йўқ эмас. YouTube тармоғида энг омадли cover’лар деб топилган ва миллион марта томоша қилинган қўшиқлар билан танишинг.
«Жонгинам»
Хонанда Муниса Ризаева марҳум ижодкор Лайлонинг «Жонгинам» қўшиғини cover йўналишида ижро этди. Мазкур қўшиқни Лайло Алиева 1997 йил ижро этган. Мазкур қўшиқнинг мусиқаси Руслан Шариповга, сўзи эса Иброҳим Жияновга тегишли. Қўшиққа Дмитрий Каробкин томонидан клип суратга олинган. Мазкур клип ўша йилларнинг энг катта бужетли ва халқаро талабга жавоб берадиган ўзбек клипи бўлган.
Хонанда Муниса Ризаева эса мазкур таронани Руслан Шарипов хотирасига бағишланган концерт дастури учун қайтадан ижро этди. Қўшиқ илк қарши олинганидан сўнг клипмейкер Дилмурод Агзамов билан ҳамкорликда клип суратга олди.
— Руслан Шарипов Лайлодан альбомга буюртма олганидан кейин мени олдига чақирган. Аввал мусиқа басталаниб, ундан кейин сўзини ёзганмиз. Аммо Руслан ака мусиқага мослаб айрим сўзларни ўзгартирганди. «Бу сўзлар адабий меъёрларга мос келмайди», деб норози бўлгандим. Аммо у қўшиқда шундай қилишга мажбур бўладиган вазиятлар бўлишини тушунтирганди.
— Муниса Ризаева «Жонгинам» қўшиғининг клипига қўшиқ муаллифларини ёзибди, аммо шеър муаллифини ёзишни унутибди. Бундан бироз жаҳлим чиқди. Кейин у тўлиқ cover қўшиқ эмас. Чунки унинг ижроси Лайлоники билан бир хил. Лайло авж нуқталарини гўзал ижро этганди, унинг ижроси барибир ўзига хос, — дейди «Жонгинам» қўшиғининг шеър муаллифи Иброҳим Жиянов.
«Кўз ёшим»
Юлдуз Усмонова 2011 йили «Кўз ёшим» номли қўшиқни ижро этган. Рок йўналишидаги мазкур қўшиққа хорижда клип суратга олингани ҳақида маълумот берилганди. Яқинда ёш хонанда Умидахон «Кўз ёшим» қўшиғини cover тарзида ижро этди. Марҳум спортчи Мурод Хонтўраев хотирасига бағишлаб, клип ҳам суратга олди.
— Бир йил аввал Юлдуз Усмонованинг турмуш ўртоқлари Мансур Агалиевга опанинг қўшиқларини қайтадан ижро этиш ниятим борлигини айтгандим. Кўп ўтмай, баъзи қўшиқларни ижро этишга рухсат беришди. Улар орасида «Кўз ёшим» қўшиғи ҳам бор эди. Рухсат олганимга ҳам 6 ойдан ошиқроқ вақт ўтди. Бу вақт мобайнида қўшиққа мусиқий сайқал бердик, клип ғояси ҳақида ўйладик. Қўшиқ cover йўналишида ижро этилган бўлса-да, унга қўпол ўзгартириш киритишни истамадик. Чунки ҳар қандай cover’да муаллифнинг имзоси сақланиб қолиши керак, — дейди хонанда Умидахон.
Мурод Хонтўраев ҳаётига бағишланган клип клипмейкер Шерзод Умаров томонидан суратга олинган. Клипда бош ролни Муҳаммадали Йўлдошев ижро этган.
«Ўйламадим»
Эски қўшиқларни янгилаб айтишга уста Достон Эргашев «Ўйламадим» қўшиғидан ҳам унумли фойдаланган. Аслида мазкур қўшиқ 1993 йили қашқадарёлик хонанда Ўктам Алиев томонидан яратилган.
— Бу қўшиқни чироқчилик Улуғбек бахши Абраев билан ҳамкорликда яратганмиз. У инсонни аввалдан ҳурмат қилардим. 1993 йили давлат тадбирида учрашиб қолганмиз ва ундан қўшиқ яратиб беришини сўраганман. 2012 йили Чироқчида қўшиққа клип ҳам олганмиз, — дейди хонанда Ўктам Алиев.
Достон Эргашев ҳам мазкур қўшиқни cover йўналишида ижро этган ва унга клип суратга олган. «Қўшиқни бир ой давомида ўйлаб яратдим», деган жумла Ўктам Алиевни ранжитган ва икки ижодкор ўртасида низо юзага келган. Аммо тан олиш керак, Достон Эргашев ижроси аввалгиларига нисбатан омадлироқ чиқди.
«Чақасан»
Хонанда Жаҳонгир Отажоновнинг «Чақасан» қўшиғи ёш ижрочи Афрўза «The cover up» лойиҳасида ижро этган. Cover йўналишидаги қўшиқ Жаҳонгир Отажоновга ҳам маъқул келди. Шу кунгача cover йўналишидаги қўшиқ Ёутубе тармоғида 7 миллион маротаба кўрилган.
«Оқбилак ойим тошкантлик»
2017 йили Ўзбекистонда хизмат кўрсатган артист Равшан Комилов томонидан ижро этилган «Оқбилак ойим тошкентлик» қўшиғи анча йиллар аввал Илҳом Иброҳимов томонидан ижро этилган. Фақат бу қўшиқ андижонлик оқбилакларга бағишланганди.
Равшан Комилов ижросидаги қўшиқ ҳам мухлисларга маъқул келган. Хонанданинг камтарона клипи ҳам мухлислар томонидан илиқ қарши олинган.
2019 йили ёш хонанда Жасмин «The cover up» лойиҳаси учун мазкур таронани cover йўналишида ижро этган. Қўшиқ шу кунга қадар YouTube тармоғида 3 миллион марта томоша қилинган.
«Дилором»
Ўзбекистон халқ артисти Ғуломжон Ёқубовнинг «Дилором» қўшиғи ўзи даврининг хит таронаси бўлган десак муболаға бўлмайди. Мазкур қўшиқ Муҳаммад Юсуф шеъри, Алишер Расулов мусиқаси асосида яратилган.
— Ғулом акам студияга келиб, яхши қўшиқ қилиб беришимни сўради. Мен эстрада йўналишида ёзсам, сизга тўғри келармикан, дедим. Ёнимда раҳматли шоир Муҳаммад Юсуф ҳам бор эди. Кейин танго йўналишида айтасизми десам, «Айтавераман замонавий инсонларнинг қулоғига ёқадиган қилиб беравер», деди. Тангони чалдимда Муҳаммадга қараб ўтиравердим. У Дилором деди. Кейин яна чалдим. У сиз малика биз Ғулом деди. Шу билан «Дилором» қўшиғи яралди, — дейди Алишер Расулов.
2020 йили ёш хонанда Ёрқинхўжа Умаров «The cover up» лойиҳаси учун «Дилором» қўшиғини cover йўналишида ижро этди. Қўшиқ шу кунгача YouTube тармоғида 2 миллиондан ортиқ томоша қилинган.
«Карвон кўрдим»
Ўзбекистон халқ артисти Шерали Жўраев Ўзбекистон халқ шоири Усмон Азим шеъри асосида «Карвон кўрдим» номли қўшиқни ижро этган.
2018 йили СанЖай тахаллуси билан ижод қилувчи Санжар Жавбердиев ижтимоий тармоқларга ўзи ижро этган «Карвон кўрдим» қўшиғини жойлаган. Қўшиқ интернет кузатувчиларига маъқул бўлгач, ижрочига қизиқиш ортган. Аммо у Интеллектуал мулк агентлиги томонидан муаллифлик ҳуқуқини бузган деб топилиб, шоирга жами 94 миллион сўм миқдорида жарима ва маънавий зарар тўлаши лозимлиги ҳақида суд қарори чиқарилган. Шу боис, хонанданинг расмий YouTube саҳифаларидан мазкур қўшиқ ва унга ишланган клип ўчиртирилган.
Мавзуга доир:
- «Уйланамиз», «Дадамнинг соясида» ва «Ўйламадим» — биринчи ижросидан кўра иккинчиси омадлироқ чиққан қўшиқлар (видео)
- «Қизил олма», «Эсингдами сени?», «Ишонма» ва ўзбек эстрадасидаги 20-30 йилдан буён «яшаётган» бошқа қўшиқлар (видео)
- «Жўжи қоро», «Акахонларим», «Эҳ, жўралар». Ҳаётдагидан кўра YouTube’да машҳур бўлган ўзбекистонлик санъаткорлар (видео)
Изоҳ (0)