Россия ва Қирғизистон ҳаво ҳужумига қарши мудофаа бўйича бирлашган минтақавий тизим яратади

Россия президенти Владимир Путин мамлакат ҳукуматининг Қирғизистон билан иккала давлат ўртасида ҳаво ҳужумига қарши мудофаа бўйича Бирлашган минтақавий тизим (БМТ) яратиш ҳақидаги таклифини қўллаб-қувватлади, деб ёзади «Интерфакс». Тегишли президент фармони ҳуқуқий ахборот порталида эълон қилинди.

Ҳужжатда Мудофаа вазирлигига Ташқи ишлар вазирлиги иштирокида Қирғизистон томони билан музокаралар ўтказиш ва ушбу битимни Бишкек билан имзолаш вазифаси юклатилди.

Аввалроқ Россия ҳукумати Мудофаа вазирлиги томонидан тақдим этилган, ТИВ ва ижро этувчи ҳокимиятнинг бошқа манфаатдор федерал органлари билан келишилган ҳамда олдиндан Қирғизистон билан ишлаб чиқилган, икки мамлакат ўртасида ҳаво ҳужумига қарши мудофаа бўйича Бирлашган минтақавий тизим яратиш тўғрисидаги битим лойиҳасини маъқуллаган эди.

Битим лойиҳасида айтилишича, «минтақада ҳаво ҳужумига қарши мудофаани такомиллаштириш мақсадларида томонлар» Россия ва Қирғизистон ўртасида ҳаво ҳужумига қарши мудофаа бўйича Бирлашган минтақавий тизим яратмоқда, у МДҲ мамлакатлари ҳаво ҳужумига қарши мудофаа бирлашган тизимининг таркибий қисми ҳисобланади.

Россия ва Қирғизистон ўртасидаги ҳаво ҳужумига қарши мудофаа бўйича Бирлашган минтақавий тизим таркибига ажратиладиган қўшинлар рўйхати томонларнинг қўшма ваколатли органлари томонидан тасдиқланади.

Россия томонидан ҳаво ҳужумига қарши мудофаа бўйича Бирлашган минтақавий тизим таркибига ажратилган қўшинларни жойлаштириш учун коллектив хавфсизлик ҳудудида Қирғизистон Россияга ушбу битим амал қиладиган даврда бепул асосда 5 гектарлик ер майдонини тақдим этади, дейилади ҳужжатда.